توقايەۆ: ۇزاق جىلداردان بەرى قازاقستان - تاجىكستاننىڭ ەكىنشى ءىرى ساۋدا سەرىكتەسى

استانا. قازاقپارات - مەملەكەت باسشىسى قاسىم- جومارت توقايەۆ پەن تاجىكستان پرەزيدەنتى ەمومالي راحمونوۆتىڭ اقوردادا وتكەن كەڭەيتىلگەن قۇرامداعى كەلىسسوزى كەزىندە ەكى ەل ۇكىمەتتەرىنە قازاقستان مەن تاجىكستان ۇكىمەتتەرىنە زاكىرلى ستراتەگيالىق جوبانى دايىنداۋ تاپسىرىلدى، دەپ حابارلايدى قازاقپارات ءتىلشىسى.

«مەن ءسىزدىڭ ساپارىڭىزعا ۇلكەن ءمان بەرىپ وتىرمىن. جاڭا عانا بۇل ساپاردى تاريحي دەپ سيپاتتادىق. وسى ساپار مەملەكەتتەرىمىز اراسىنداعى ارىپتەستىكتى جاڭا دەڭگەيگە كوتەرەدى، وداقتاستىق ءوزارا بايلانىس تۋرالى دەكلاراتسياعا قول قويىلادى»، - دەدى قاسىم- جومارت توقايەۆ.

سونداي- اق پرەزيدەنت وداقتاستىق قاتىناستار جاڭا ستراتەگيالىق جوبالارعا جول اشاتىنىن اتاپ ءوتتى.

«سوندىقتان الدىمىزدا ۇلكەن جۇمىس تۇر. ويتكەنى وداقتاستىق قاتىناستار جاڭا ستراتەگيالىق جوبالاردى كوزدەيدى. ءبىز جاڭا عانا ەكى- ءۇش زاكىرلى ستراتەگيالىق جوبانى دايىنداۋ قاجەتتىگىن ايتىپ، ۇكىمەتتەرگە وسى ماقساتتاردى ىسكە اسىرۋدى تاپسىردىق. جاقىن ارادا ەكىجاقتى ىنتىماقتاستىقتىڭ جاڭا بەلەسىنە شىعامىز دەپ توپشىلايمىن»، - دەدى قاسىم- جومارت توقايەۆ.

سونداي-اق، قازاقستان مەن تاجىكستان پرەزيدەنتتەرى شاعىن قۇرامدا كەلىسسوز جۇرگىزدى.

قاسىم- جومارت توقايەۆ ەمومالي راحمونعا ءىلتيپات بىلدىرە وتىرىپ، تاجىكستان قازاقستاننىڭ سەنىمدى ستراتەگيالىق سەرىكتەسى، سونداي- اق باۋىرلاس ءارى جاقىن مەملەكەت ەكەنىن اتاپ ءوتتى.

«ءبىزدى ەجەلدەن ورتاق تاريح، مادەني جانە رۋحاني قۇندىلىقتار تىعىز بايلانىستىرادى. ەكى ەل اراسىنداعى ديپلوماتيالىق قارىم- قاتىناستاردىڭ 30 جىلدىعىندا وداقتاستىق ءوزارا ءىس- قيمىل تۋرالى دەكلاراتسياعا قول قويىپ وتىرمىز. مۇنىڭ سيمۆولدىق ءمانى بار. بۇل قۇجات وتە ماڭىزدى ءارى بولاشاققا ارنالعان. سونداي- اق ءبىزدىڭ مەملەكەتتەرىمىزدىڭ ۇلتتىق مۇددەلەرىنە تولىق ساي كەلەدى. بۇل باعىتتا ارامىزدا ەشقانداي كۇماندى ماسەلە جوق. قازاقستان مەن تاجىكستان ساۋدا- ەكونوميكالىق ىنتىماقتاستىقتى بەلسەندى دامىتىپ كەلەدى. ۇزاق جىلداردان بەرى قازاقستان - تاجىكستاننىڭ ەكىنشى ءىرى ساۋدا سەرىكتەسى. تەك بىلتىردىڭ وزىندە ەكىجاقتى ساۋدا اينالىمى 18,5 پايىزعا ارتىپ، 1,4 ميلليارد دوللارعا جەتتى. قازىرگى جاعدايدا بۇل - جاقسى ناتيجە. ونەركاسىپ، اۋىل شارۋاشىلىعى، كولىك جانە باسقا دا سالالارداعى ءبىرقاتار ەكونوميكالىق جوبا جۇزەگە اسىرىلۋ ساتىسىندا تۇر. ءسىزدىڭ ساپارىڭىز اياسىندا ەكونوميكانىڭ ءتۇرلى سەكتورىنداعى ءوزارا ءىس- ارەكەتتى ودان ءارى كەڭەيتۋگە باعىتتالعان جاڭا كەلىسىمدەردىڭ ماڭىزدى توپتاماسىنا قول قويىلادى»، - دەدى قازاقستان پرەزيدەنتى.

ق. توقايەۆ كەشە قوس ەل اراسىنداعى ىنتىماقتاستىقتىڭ پەرسپەكتيۆالارىنا قاتىستى بەيرەسمي ءارى ءوزارا سەنىمگە نەگىزدەلگەن جاعدايدا پىكىر الماسۋ وتكەنىن اتاپ ءوتتى.

«ەڭ باستىسى، ساۋدا كولەمىن ەكى ميلليارد دوللارعا دەيىن ارتتىرۋعا مۇمكىندىك بار. ءبىز بيزنەسمەندەردىڭ 1,8 ميلليارد دوللار كولەمىندەگى كەلىسىمشارتتارعا قول قويعانىنا كوڭىلىمىز تولاتىنىن اتاپ وتتىك. بۇل - وتە جاقسى ناتيجە. ەكى ەل ۇكىمەتتەرى وسى كەلىسىمشارتتاردىڭ ورىندالۋىن مۇقيات قاداعالاپ وتىرۋعا ءتيىس دەپ ۇمىتتەنەمىن. ءبىزدىڭ بەرىك ءارى ۇزاقمەرزىمدى قارىم- قاتىناسىمىزدىڭ مىزعىماس نەگىزى - تىعىز مادەني- گۋمانيتارلىق بايلانىستار. بىلتىر دۋشانبەدە قازاقستان كينوسى كۇندەرى تابىستى وتكىزىلدى. بيىل ءبىزدىڭ ەلىمىزدە تاجىكستاننىڭ مادەنيەت كۇندەرىن وتكىزۋ جوسپارلانىپ وتىر. ءبىز وسى شاراعا مۇقيات دايىندالۋىمىز كەرەك»، - دەدى مەملەكەت باسشىسى.