وتباسىنىڭ بەرەكەسىن الاتىن تيرانداردى جازالاۋعا تۋىستارى كەدەرگى – ءى ءى م

استانا. قازاقپارات - ىشكى ىستەر ۆيتسە-ءمينيسترى يگور لەپەحا ءۇي بۇزاقىلاردى جازالاۋعا تۋىستارىنىڭ قورقىنىشى كەدەرگى ەكەنىن ايتتى، دەپ حابارلايدى قازاقپارات ءتىلشىسى.

«ۇرىپ-سوعۋ» جانە «دەنساۋلىققا جەڭىل زيان كەلتىرۋ» قىلمىستىق زاڭناما تارتىبىمەن قۋدالانا باستاسا دا، سانى ازايماي تۇر. 2015-2016-جىلدارى تۇسكەن 100 مىڭنان استام حابارلاما بويىنشا كىنالىلەرگە ەشقانداي جازا قولدانىلماعان. زاڭناما وزگەرگەنىمەن ءۇي بۇزاقىلاردان زارداپ شەگەتىندەردىڭ ماسەلەسى شەشىلگەن جوق»، - دەدى يگور لەپەحا ءماجىلىستىڭ تۇرمىستىق زورلىق-زومبىلىققا ارنالعان جيىنىندا.

ونىڭ سوزىنشە، تۇرمىستىق زورلىق-زومبىلىقتان زارداپ شەگۋشىلەر ۇيدەگى داۋدى سىرتقا شىعارماۋدى ءجون كورەدى.

ويتكەنى ءۇي بۇزاقىنىڭ قارجىسىنا تاۋەلدى.

«ىشكى ىستەر مينيسترلىگى تۇرمىستىق زورلىق-زومبىلىق تۋرالى ءاربىر بەلگى بويىنشا دەن قوياتىنداي شارالار قابىلداپ جاتىر. ولاردىڭ %60 بويىنشا پوليتسيا جابىرلەنۋشىلەردىڭ ارىزىن قايتىپ الۋىنا بايلانىستى شارا قولدانا المادى. ال قولدانىستاعى زاڭناما بويىنشا، ءوتىنىش بولماسا، پوليتسيا قىزمەتكەرى «ءۇي تيراندارىن» جاۋاپقا تارتا المايدى. جازاسىز ەكەنىن كورگەن زورلىق كورسەتۋشى «ماعان بارىنە رۇقسات» دەگەن تۇسىنىككە بوي الدىرادى. ونىڭ سوڭى ودان دا اۋىر زارداپتارعا اكەلەدى»، - دەيدى ۆيتسە-مينيستر.