قازاقستان شەكاراسى ارقىلى وتەتىن جۇك كولىكتەرىنەن قانشا تولەم الىنادى

استانا. قازاقپارات - قارجى مينيسترلىگىنە قاراستى مەملەكەتتىك كىرىستەر كوميتەتى «ق ر مەملەكەتتىك شەكاراسى ارقىلى اۆتوموبيل كولىك قۇرالدارىن، جۇكتەر مەن تاۋارلاردى وتكىزۋ، سونداي-اق ولاردى ەلەكتروندىق كەزەك بويىنشا ءوتۋى ءۇشىن تولەماقى مولشەرلەرىن ايقىنداۋ تۋرالى» بۇيرىعىن اشىق تالقىعا شىعاردى، دەپ حابارلايدى قازاقپارات ءتىلشىسى.

قۇجاتقا ساي، ەلىمىزدىڭ شەكاراسى ارقىلى وتەتىن جۇك كولىكتەرىنەن ەندى تولەم الىنادى.

«ق ر مەملەكەتتىك شەكاراسى ارقىلى جۇك اۆتوموبيلدەرىن، ونىڭ ىشىندە تىركەمەلەرى بار جۇك كولىكتەرىن جانە ەرشىكتى تارتقىشتاردى وتكىزۋ ءۇشىن 3 ا ە ك (10350 تەڭگە) مولشەرىندە اقى بەلگىلەۋ ۇسىنىلادى»، - دەپ جازىلعان كوپشىلىك تالقىلاۋعا شىعارىلعان قۇجاتتا.

بەلگىلى بولعانداي، اتالعان بۇيرىق 2024 -جىلدىڭ 1-قاڭتارىنان باستاپ قولدانىسقا ەنگىزىلەدى.

قۇجات 25- ساۋىرگە دەيىن اشىق تالقىدا بولادى.

ايتا كەتسەك، بۇعان دەيىن پرەمەر- مينيستر ءاليحان سمايىلوۆ سەنات دەپۋتاتىنىڭ ساۋالىنا جولداعان جاۋابىندا قازاقستان- رەسەي شەكاراسىنداعى 27 وتكىزۋ پۋنكتىنىڭ اۋماعى كەڭەيەتىنىن مالىمدەپ ەدى.