بىزدە اكادەميكتەر تىم كوپ، كەيبىرىنىڭ تازا عىلىمعا ەش قاتىسى جوق - قاسىم-جومارت توقايەۆ

استانا. قازاقپارات - ۇلتتىق عىلىم اكادەمياسىنىڭ جۇمىسى تۇبەگەيلى وزگەرۋگە ءتيىس. بۇل پىكىردى مەملەكەت باسشىسى قاسىم-جومارت توقايەۆ عىلىم جانە تەحنولوگيالار جونىندەگى ۇلتتىق كەڭەستىڭ ءبىرىنشى وتىرىسىندا ايتتى، دەپ حابارلايدى قازاقپارات.

«عىلىمدى دامىتۋدىڭ جاڭا ۇلگىسىنە سايكەس ۇلتتىق عىلىم اكادەمياسىنىڭ ءرولى ەرەكشە بولادى. عىلىم اكادەمياسىنا جاقىندا پرەزيدەنت جانىنداعى ورگان مارتەبەسى بەرىلدى. ونى قارجىلاندىرۋ ماسەلەسى شەشىلدى. اكادەميكتەرگە ءومىر بويى ستيپەنديا تولەنەتىن بولدى.

ءبىراق وسى جەردە اشىق ايتۋىم كەرەك: بىزدە اكادەميكتەر تىم كوپ، كەيبىر اكادەميكتەردىڭ تازا عىلىمعا ەش قاتىسى جوق. ءبىر قاراعاندا، اكادەميك دەگەن اتى بار. ءبىراق عىلىمدى دامىتۋعا قوسقان ۇلەسىن ەشكىم بىلمەيدى. وسىنداي اكادەميكتەردىڭ عىلىمي ساپاسى دا، ولاردىڭ عىلىمعا قوسقان ۇلەسى دە كۇماندى. بۇل اكادەمياعا نۇقسان كەلتىرگەنى ءسوزسىز. سوندىقتان اكادەميانىڭ جاڭا باسشىلىعى وسى ماڭىزدى ماسەلەگە نازار اۋدارۋى كەرەك. عىلىم اكادەمياسىنىڭ بەدەلى، ابىرويى ءمىنسىز بولۋى قاجەت.

ناعىز عالىم بولۋ - اكادەميك نە بولماسا دوكتور اتاعىنا يە بولۋ ەمەس، جان- دۇنيەڭمەن بەرىلىپ عىلىممەن اينالىسۋ، زەرتتەۋ جۇرگىزۋ ارقىلى قوعامعا، ەلگە پايداڭدى تيگىزۋ ەكەنىن نازاردا ۇستاۋ قاجەت. اكادەميانىڭ جۇمىسى تۇبەگەيلى وزگەرۋگە ءتيىس»، - دەدى قازاقستان پرەزيدەنتى.