ابزال قۇسپان ەلگە اقشانى قايتارۋعا قاتىستى دەپۋتاتتاردىڭ تالابىن جاريالادى

استانا. قازاقپارات - بۇگىن ءماجىلىستىڭ جالپى وتىرىسىندا دەپۋتات ابزال قۇسپان ەلدەن زاڭسىز جولمەن شىعارىلعان قاراجاتتى قايتارۋعا قاتىستى بەرىلگەن تاپسىرمالار ورىندالماي جاتقانىن ايتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ باستاماسىمەن ەلدەن زاڭسىز جولمەن شىعارىلعان قاراجاتتى قايتارۋ، سونداي- اق زاڭسىز جولمەن الىنعان ەكونوميكالىق رەسۋرستاردىڭ مونوپوليالىق (وليگوپوليالىق) شوعىرلانۋىن انىقتاۋ، ولاردى مەملەكەتكە قايتارۋعا باعىتتالعان ءبىرقاتار تاپسىرما بەرىلگەن. ماسەلەن، مەملەكەت باسشىسىنىڭ 2022 -جىلعى 5- ماۋسىمداعى جارلىعىنا سايكەس، ەلدەن زاڭسىز شىعارىلعان اكتيۆتەردى قايتارۋ ماقساتىندا ۆەدومستۆوارالىق كوميسسيا قۇرىلىپ، ونىڭ ءتوراعاسى بولىپ باس پروكۋرور بەكىتىلگەن ەدى. 2022 -جىلدىڭ 26- قاراشاسىندا پرەزيدەنت «زاڭسىز شىعارىلعان اكتيۆتەردى مەملەكەتكە قايتارۋ جونىندەگى شارالار تۋرالى» جارلىققا قول قويعان بولاتىن. وسى ورايدا ۇكىمەت باسشىسىنا ءبىرقاتار تاپسىرما جۇكتەلدى. ەندى، وسى ەكى قۇجاتتىڭ تالاپتارىنا قاراساق، تولىق دەڭگەيدە ورىندالماعانىن بايقاپ وتىرمىز»، - دەدى ا. قۇسپان پرەمەر- مينيستر مەن باس پروكۋروردىڭ اتىنا جولداعان ساۋالىندا.

وسى ورايدا دەپۋتات 31-ناۋرىزعا دەيىن ماجىلىسكە ءتيىستى زاڭ جوباسىن ەنگىزۋ تاپسىرماسى ورىندالماعانىن ايتتى.

«سونىمەن قاتار زاڭسىز شىعارىلعان اكتيۆتەردى قايتارۋ راسىمدەرىنىڭ جاريالىعىن قامتاماسىز ەتۋ تۋرالى تالاپ قويىلعان. وسى ورايدا ءبىراز بۇقارالىق اقپارات قۇرالدارىن قاراپ شىقتىم. الايدا، قوعامعا انىق اقپارات بەرىلمەي وتىرعانىن بايقادىم. بۇل تۇرعىدا قوعام جاعىنان قويىلاتىن سۇراقتار وتە كوپ. اتاپ ايتقاندا، قانشا قاراجات ەلگە قايتارىلدى؟ ىشتەگى وليگوپوليا وكىلدەرىنەن قانشا قاراجات ءوندىرىلدى؟ ولاردىڭ قاي بولىگى قاراجاتتى ءوز ەركىمەن قايتاردى؟ ءماجبۇرلى تۇردە قايتارعاندارعا قاتىستى قىلمىستىق ىستەر قوزعالدى ما؟ ازىرگە، وسى سۇراقتارعا جاۋاپ بەرىلمەي وتىر»، - دەدى ابزال قۇسپان.

«بۇل ماسەلە قاتىستى دەپۋتاتتاردىڭ وزدەرىندە مالىمەت بولماسا، وندا اكتيۆتەردى قايتارۋمەن بايلانىستى الدىمىزعا تۇسەتىن زاڭ جوباسىن قالاي، قايتىپ قابىلداماقپىز. وسى ورايدا ءبىر توپ دەپۋتاتتىڭ اتىنان ەكى تالاپ قويىپ وتىرمىز.

بىرىنشىدەن، باس پروكۋرور بىلتىرعى ماۋسىم ايىنان باستاپ اكتيۆتەردى قايتارۋعا باعىتتالعان ارنايى كوميسسيانىڭ وسى كەزگە دەيىن اتقارعان قىزمەتى تۋرالى تولىق اقپارات جولداۋى قاجەت.

ەكىنشىدەن، باس پروكۋرور باسقاراتىن ۆەدومستۆوارالىق ارنايى كوميسسياعا جانە ۇكىمەت جانىنداعى جۇمىس توپتارىنا ماماندىقتارى سايكەس كەلەتىن دەپۋتاتتاردىڭ دا قاتىسۋىن قامتاماسىز ەتۋ كەرەك»، - دەدى دەپۋتات.