استانادا نارازىلىققا شىققان مۇنايشىلار جاڭاوزەنگە قايتتى

استانا. قازاقپارات - «بەرالى ماڭعىستاۋ Company» كومپانياسىنىڭ بۇرىنعى قىزمەتكەرلەرى قاماۋدان بوساتىلىپ، پويىزبەن جاڭاوزەن قالاسىنا كەتتى. بۇل تۋرالى «قازمۇنايگاز» كومپانياسىنان ءمالىم ەتتى، دەپ حابارلايدى قازاقپارات ءتىلشىسى.

«ق م گ بايلانىس توبى مەن «بەرالى ماڭعىستاۋ Company» وكىلدەرى ارنايى جۇمىس كوميسسياسىن قۇرۋ تۋرالى كەلىسىمگە كەلدى.

ول كوميسسيا «بەرالى ماڭعىستاۋ Company» كومپانياسىنىڭ بۇرىنعى قىزمەتكەرلەرىنىڭ تالاپتارىن زاڭ اياسىندا شەشۋ ءۇشىن قاراستىراتىن بولادى. كوميسسيا قۇرامىنا «بەرالى ماڭعىستاۋ Company» كومپانياسىنىڭ بۇرىنعى قىزمەتكەرلەرىنىڭ 10 ادامى كىرەدى.

قۇقىق قورعاۋ ورگاندارى ۇستاعان قالعان مۇنايشىلار بوساتىلىپ، استانا ۋاقىتى بويىنشا 8:57-دە پويىزبەن جاڭاوزەن قالاسىنا كەتتى»، - دەپ اتاپ ءوتتى كومپانيادان.

مۇنايشىلار دا استانانىڭ تەمىرجول ۆوكزالىنان ۆيدەوۇندەۋ جاساپ، وزدەرىنىڭ ءدىن-امان ەكەندىكتەرىن ايتتى جانە قولداۋ بىلدىرگەن جەرلەستەرىنە ريزاشىلىعىن ءبىلدىردى.

ەسكە سالا كەتەيىك، 10-ساۋىردە ەنەرگەتيكا مينيسترلىگى عيماراتىنىڭ الدىنا 70-كە جۋىق جاڭاوزەندىك جينالدى.

ەنەرگەتيكا ءمينيسترى الماسادام ساتقاليەۆ ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا ۆەدومستۆو عيماراتىنىڭ ماڭايىندا تۇنەپ شىققان جاڭاوزەندىك جۇمىسشىلاردىڭ تالابى بويىنشا رەسمي شەشىم ازىرلەنىپ جاتقانىن ايتتى.

بۇل ماسەلەگە پىكىر بىلدىرگەن ۆيتسە- پرەمەر التاي كولگىنوۆ زاڭ اياسىندا ارەكەت ەتۋ قاجەتتىگىن، «تەندەردەن ۇتىلعان كومپانيانىڭ قايتادان ۇتىپ شىققانىن تالاپ ەتۋ» دۇرىس ەمەستىگىن ايتتى.

كەشە كەشكىسىن ەنەرگەتيكا مينيسترلىگى الدىنا جينالعان ءبىر توپ جاڭاوزەندىك مۇنايشىلاردى پوليتسيا ۇستاپ اكەتتى.

كەيىن نارازىلىققا شىققان مۇنايشىلاردىڭ كوشباسشىلارى مالىمدەمە جاساپ، ەكى جاق كەلىسىمگە كەلگەنىن حابارلادى.

ماڭعىستاۋ وبلىسىنىڭ اكىمى نۇرلان نوعايەۆ تا تۇندە ۆيدەوۇندەۋ جاريالاپ، حالىقتى سابىرلىققا شاقىردى.