ەنەرگەتيكا مينيسترلىگى قازاقستان مۇنايى قانشا جىلعا جەتەتىنىن ايتتى

استانا. قازاقپارات - ەنەرگەتيكا ءمينيسترى الماسادام ساتقاليەۆ ب ا ق وكىلدەرىنىڭ ساۋالىنا جاۋاپ بەرە وتىرىپ، ەلدەگى مۇناي قورى تۋرالى مالىمەت ايتتى، دەپ حابارلايدى قازاقپارات ءتىلشىسى.

«الدىن الا بولجامدار بويىنشا مۇناي 100 جىلعا انىق جەتەدى. ءبىراق بىزدە پەرسپەكتيۆالى بلوكتار بار. ۇكىمەت مەملەكەت باسشىسىنىڭ قولداۋىمەن جاڭا مودەلدەگى كەلىسىمشارت دايىندادى. ول بويىنشا جاڭا مۇناي كەنىشتەرىنە بارلاۋ جاساعاندارعا سالماقتى جەڭىلدىكتەر ۇسىنىلادى. كوپتەگەن كومپانيالار ول جەڭىلدىكتى پايدالاندى دا. جەكە ايتساق، «لۋكويل» سونداي كەلىسىمشارتقا قول قويدى»، - دەدى الماسادام ساتقاليەۆ.

ونىڭ مالىمەتىنشە، ازەربايجان تاراپى دا قازاقستان اۋماعىندا مۇناي قورىن بارلاۋعا اتسالىسۋعا نيەتتى.

«ازەربايجان پرەزيدەنتى يلحام اليەۆتىڭ ساپارى كەزىندە باكۋ دەلەگاتسياسى قازاقستانعا ينۆەستيتسيا سالۋعا نيەت ءبىلدىردى. ولار كومىرسۋتەك كوزدەرىن بارلاۋ، يگەرۋ تۋرالى جاڭا ماسەلەلەردى كوتەردى. قازىر ەنەرگياعا دەگەن سۇرانىستىڭ ارتىپ كەلە جاتقانىن ەسكەرسەك، رەسۋرس بازاسىن تولىقتىرۋعا قاراجات جۇمساۋدى جالعاستىرۋىمىز كەرەك»، - دەدى مينيستر.