توقايەۆ ازەربايجانمەن قانداي جوبالاردى بىرلەسە جۇزەگە اسىرۋعا بولاتىندىعىن ايتتى
بۇل تۋرالى ازەربايجان پرەزيدەنتى يلحام اليەۆپەن كەلىسسوزدەردەن كەيىنگى ب ا ق وكىلدەرىنە ارنالعان بريفينگتە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ءبىزدىڭ ەكونوميكالارىمىزدىڭ جاڭا ءوسىم نۇكتەلەرى بولۋى مۇمكىن ۇدەمەلى ينۆەستيتسيالىق جوبالاردى جۇزەگە اسىرۋعا جەكە توقتالدىق. ونەركاسىپ، توقىما، اگروونەركاسىپ، قۇرىلىس سالالارىندا ءىرى كاسىپورىنداردى بىرلەسە اشۋعا بولادى. ءبىز ەكى ەلدىڭ ۇكىمەتتەرىنە بىرلەسە ىسكە قوسۋ ءۇشىن ءىرى جوبالاردى ايقىنداۋدى تاپسىردىق»، - دەدى مەملەكەت باسشىسى.
پرەزيدەنت اۋىل شارۋاشىلىعى سالاسىندا دا ءوزارا ىنتىماقتاستىق ءۇشىن الەۋەتتىڭ زور ەكەندىگىنە نازار اۋدارتتى.
«وتكەن جىلدىڭ قورىتىندىسىندا اگروونەركاسىپ كەشەنى ونىمدەرىنىڭ ەكىجاقتى ساۋدا-ساتتىق كولەمى 3 ەسە ارتىپ، 146 ميلليون دوللاردى قۇرادى. وسىلايشا، بۇگىندە اۋىل شارۋاشىلىعىنىڭ ۇلەسى ءبىزدىڭ جالپى تاۋار اينالىمىنىڭ ۇشتەن بىرىنە تيەسىلى بولىپ وتىر. ءبىز اۋىل شارۋاشىلىعى ونىمدەرىن ءوزارا جەتكىزۋدى ودان ارى ۇلعايتۋدىڭ ماڭىزدىلىعىن اتاپ وتتىك»، - دەدى قاسىم-جومارت توقايەۆ.
