قاسىم-جومارت توقايەۆ يلحام اليەۆپەن كەلىسسوزدەردى جوعارى باعالادى
بۇل تۋرالى اقوردادا ازەربايجان پرەزيدەنتى يلحام اليەۆپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى، حابارلايدى قازاقپارات ءتىلشىسى.
«بۇگىن وتكەن تولىق فورماتتى كەلىسسوزدەردىڭ ناتيجەلەرىن جوعارى باعالايمىن. بۇل ەكىجاقتى بايلانىستاردى جان-جاقتى نىعايتۋعا دەگەن ءوزارا كوزقاراسىمىزدى تاعى دا راستادى. ءبىز سەنىمدى جاعدايدا ىنتىماقتاستىعىمىزدىڭ بارلىق اسپەكتىسى بويىنشا پىكىر الماستىق. ەكى ەلدىڭ ءوزارا ءىس-قيمىلىن ودان ءارى تەرەڭدەتۋدىڭ پەرسپەكتيۆالارى مەن باعىتتارىن تالقىلادىق. ءبىزدىڭ ورتاق كۇش-جىگەرىمىزدىڭ ارقاسىندا قازاقستان مەن ازەربايجان اراسىنداعى قارىم-قاتىناس سوڭعى جىلدارى ودان دا اشىق ءارى جان-جاقتى سيپاتقا يە بولدى. ساياسي جانە ساۋدا-ەكونوميكالىق، مادەني-گۋمانيتارلىق ىنتىماقتاستىق جانداندى»، - دەدى مەملەكەت باسشىسى.
پرەزيدەنت بۇگىن قول قويىلعان ءبىرقاتار جاڭا كەلىسىم ەكى ەلدىڭ كوپقىرلى سەرىكتەستىگىنە تىڭ سەرپىن بەرەتىندىگىن باسا ايتتى.
«قازاقستان مەن ازەربايجان ساۋدا-ەكونوميكالىق سالادا ءوزارا ءتيىمدى نەگىزدە ىنتىماقتاسادى»، - دەدى قاسىم-جومارت توقايەۆ.
