قازاقستان مەن ازەربايجان ىقپالداستىعىن ودان ارى نىعايتۋعا مول مۇمكىندىك بار - توقايەۆ
بۇل تۋرالى اقوردادا ازەربايجان پرەزيدەنتى يلحام اليەۆپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى، حابارلايدى قازاقپارات ءتىلشىسى.
«ەڭ الدىمەن ازەربايجان پرەزيدەنتى قۇرمەتتى يلحام گەيداروعلۋعا مەنىڭ شاقىرۋىمدى قابىل الىپ، قازاقستانعا ارنايى ساپارمەن كەلگەنى ءۇشىن زور العىس ايتامىن. بۇل ساپار ءسىزدىڭ ەكى ەل اراسىنداعى ىنتىماقتاستىقتى ودان ارى نىعايتۋعا ىقىلاستى ەكەنىڭىزدى بىلدىرەدى. مەن مۇنى تولىق قولدايمىن. قازاقستان مەن ازەربايدان ەجەلدەن دوستىعى بەرىك، باۋىرلاس حالىقتار. ءبىزدىڭ سالت-ءداستۇرىمىز، مادەنيەتىمىز، ءتىلىمىز بەن ءدىلىمىز ۇقساس. ەڭ باستىسى تاريحى تامىرلاس ەلدەرىمىزدىڭ ماقساتى مەن مۇراتى ورتاق. سوندىقتان بۇگىنگى ساپاردىڭ ماڭىزى ەرەكشە»، - دەدى مەملەكەت باسشىسى.
پرەزيدەنت ەكى ەل اراسىنداعى بايلانىستار ءوزارا سەنىمگە جانە قولداۋعا نەگىزدەلگەنىن باسا ايتتى.
«ياعني، ەكىجاقتى ىقپالداستىقتى ودان ارى نىعايتۋعا مول مۇمكىندىك بار. ءبىز بۇگىن شاعىن جانە كەڭەيتىلگەن قۇرامدا مازمۇندى كەلىسسوز وتكىزدىك. ساۋدا-ەكونوميكا، كولىك-ترانزيت، ەنەرگەتيكا سالالارىنداعى قارىم-قاتىناستى دامىتۋ ماسەلەسىن تالقىلادىق. سونداي-اق مادەني-گۋمانيتارلىق بايلانىستى تەرەڭدەتۋگە قاتىستى ءبىرقاتار كەلىسىمگە قول جەتكىزدىك. وسى ساپاردىڭ ناتيجەلەرى قازاقستان مەن ازەربايجاننىڭ قارىم-قاتىناسىن جاڭا دەڭگەيگە كوتەرەدى دەپ سەنەمىن»، - دەدى قاسىم-جومارت توقايەۆ.
