قازاقستان يەرۋساليمدەگى مەشىتتە بولعان شابۋىلعا قاتىستى ءوز ۇستانىمىن ءبىلدىردى
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
«قازاقستان قاسيەتتى «ءال-اقسا» مەشىتىندە مۇسىلماندارعا شابۋىل جاسالۋىنا بايلانىستى تاياۋ شىعىستاعى شيەلەنىستىڭ ورشۋىنە قاتىستى ءوزىنىڭ الاڭداۋشىلىعىن بىلدىرەدى. قالىپتاسقان جاعدايدا تاراپتار ۇستامدىلىق تانىتىپ، زورلىق-زومبىلىققا جانە احۋالدىڭ ودان ءارى ۋشىعۋىنا اكەلەتىن قادامداردان، سونداي-اق ارانداتۋ ءىس-ارەكەتتەرىنەن باس تارتادى دەپ ۇمىتتەنەمىز»، - دەدى ايبەك سمادياروۆ مينيسترلىكتە وتكەن باسپا ءسوز ءماسليحاتىندا.
ونىڭ مالىمدەۋىنشە، قاسيەتتى رامازان ايى مەن پەساح مەيرامى كەزەڭىندە ساياسي، ءدىني جانە قوعامدىق كوشباسشىلار اتالعان شيەلەنىستى ازايتۋعا بار كۇشىن سالادى دەپ ءۇمىت ارتادى.
«قازاقستان ءاردايىم تولەرانتتىق جانە دىندەر اراسىنداعى ديالوگتى نىعايتۋعا شاقىرا وتىرىپ، بىرىككەن ۇلتتار ۇيىمى قاۋىپسىزدىك كەڭەسىنىڭ قارارلارىنا سايكەس تاياۋ شىعىس ماسەلەسىن بەيبىت جولمەن شەشۋگە باعىتتالعان حالىقارالىق قوعامداستىقتىڭ كۇش-جىگەرىن قولدايدى»، - دەيدى ول.
