ۇلتتىق بانك الاياقتىق ارەكەتتەردىڭ كوبەيىپ كەتكەنىن ەسكەرتتى

استانا. قازاقپارات - قازاقستان ۇلتتىق بانكى حالىقارالىق اۋدارىمدارمەن بايلانىستى الاياقتىق ارەكەتتەردىڭ كوبەيگەنىن ەسكەرتتى، دەپ حابارلايدى قازاقپارات ۇلتتىق بانكتىڭ باسپا ءسوز قىزمەتىنە سىلتەمە جاساپ.

جەكە جانە زاڭدى تۇلعالار ۇلتتىق بانككە شەتەل ۆاليۋتاسىمەن اقشا الۋعا جاردەم كورسەتۋدى سۇراپ، وتىنىشپەن جۇگىنىپ جاتادى. ادەتتە، مۇنداي وتىنىشتەرگە جالعان تولەم قۇجاتتارى (سونىڭ ىشىندە SWIFT فورماتىندا) جانە ەسەپتە جوق شوتتار مەن اقشا اۋدارىمدارىن راستايتىن شارتتار قوسا بەرىلەدى.

نازار اۋدارۋدى سۇرايمىز، ۇلتتىق بانك ورتالىق بانك سانالادى جانە ول قازاقستان رەسپۋبليكاسىنىڭ بانك جۇيەسىندە جوعارعى (ءبىرىنشى) دەڭگەيدى بىلدىرەدى. ۇلتتىق بانك جەكە تۇلعالارعا قىزمەت كورسەتپەيدى جانە ق ر رەزيدەنت، بەيرەزيدەنت تۇرعىندارىنا اقشا اۋدارمايدى.

ۇلتتىق بانك SWIFT ارقىلى كليەنت تولەمدەرىنە قىزمەت كورسەتۋ پروتسەسىنە قاتىسپايدى جانە SWIFT ارقىلى وپەراتسيا جۇرگىزۋگە رۇقسات بەرمەيدى.

«ۇلتتىق بانك جەكەلەگەن ۆاليۋتالىق شارتتارعا ۆاليۋتا وپەراتسيالارى بويىنشا دەرەكتەردى جيناۋ ماقساتىندا عانا ەسەپتىك نومىرلەردى تىركەيتىنىن حابارلايمىز. بۇل ءراسىم رۇقسات ەتۋ، سانكسيا سالۋ نەمەسە ماقۇلداۋ قىزمەتىن اتقارمايدى.

ەسەپتىك ءنومىردى ۇلتتىق بانك رەتتەۋشى تاراپىنان قانداي دا ءبىر مىندەتتەمەسىز بەرەدى جانە ونىڭ بولۋى كەلىسىم بويىنشا اقشا تۇسكەنىن نە جونەلتىلگەنىن بىلدىرمەيدى. بۇل رەتتە ءنومىر بەرۋ قازاقستان رەسپۋبليكاسى زاڭناماسىنىڭ تالاپتارىن بۇزعانى ءۇشىن تۇلعالاردى جاۋاپكەرشىلىكتەن بوساتپايدى»، - دەلىنگەن حابارلامادا.