سىرتقى ينفلياتسيالىق قىسىم جوعارى قالپىن ساقتاپ وتىر - ءپىرماتوۆ
«سىرتقى ينفلياتسيالىق قىسىم السىرەگەنىنە قاراماستان، جوعارى قالپىن ساقتاپ وتىر. ازىق-تۇلىكتىڭ الەمدىك باعاسى تومەندەپ كەلەدى. الايدا ول سوڭعى بەس جىلداعى ورتاشا ماندەردەن جوعارى قالىپتاسۋدا. وسىعان بايلانىستى امەريكا قۇراما شتاتتارىندا جانە ەۋروپالىق وداق ەلدەرىندە تۇتىنۋشىلىق ينفلياتسيا جوعارى دەڭگەيدە قالىپ وتىر. ەۋروپا ورتالىق بانكى ينفلياتسيانى جوعارى ماندەردە ۇزاعىراق قالادى دەپ كۇتەدى. وسىعان بايلانىستى فەدەرالدىق رەزەرۆتىك جۇيە مەن ەۋروپا ورتالىق بانكىنىڭ ريتوريكاسى بانك سەكتورىنداعى پروبلەمالارعا قاراماستان، كۇشەيتىلگەن قالپىندا قالىپ وتىر»، - دەدى ۇ ب ءتوراعاسى.
دەگەنمەن، ول ا ق ش پەن ەۋروپا بانك سەكتورىنداعى پروبلەمالار مۇناي باعاسىنىڭ ديناميكاسىنا اسەر ەتكەنىن اتاپ ءوتتى.
«وسىلايشا، الەمدىك ەكونوميكانىڭ رەتسەسسياعا ۇشىراۋ جانە شيكىزاتقا سۇرانىستىڭ تومەندەۋ تاۋەكەلدەرىنىڭ كۇشەيۋىنە بايلانىستى مۇناي باعاسى 2023-جىلعى بازالىق سەناريدەگى ورتاشا ەسەپپەن باررەلىنە 88 دوللار دەڭگەيىنەن ءسال تومەن قالىپتاستى. وسىعان قاراماستان، مۇناي باعالارى قالپىنا كەلە باستادى. ال وسى جىلى مۇناي باعالارى قىتايداعى سۇرانىستىڭ جاقسارۋىنان جانە وپەك+ ساياساتىنان قولداۋ تابادى.
2023-جىلعى اقپاندا فاو ازىق-تۇلىك باعالارىنىڭ يندەكسى وسىمدىك مايى مەن ءسۇت ونىمدەرى باعاسىنىڭ ارزانداۋى، سونداي-اق استىق پەن ەت قۇنىنىڭ ازداپ تومەندەۋى ناتيجەسىندە %0,6 ءتۇستى. اتالعان ازىق-تۇلىك باعالارى تومەندەدى، الايدا قانت باعاسى قارقىن الا ءوستى. باياۋلاعانىنا قاراماستان، ءالى دە جوعارى قالپىندا تۇرعان ينفلياتسياعا بايلانىستى ءىرى ورتالىق بانكتەر اقشا-كرەديت شارتتارىن كۇشەيتۋدى جالعاستىردى. امەريكا قۇراما شتاتتارىنىڭ فەدەرالدى رەزەرۆتىك جۇيەسى سوڭعى وتىرىستا مولشەرلەمەنى 4,75-5 پايىز دياپازونىنا دەيىن 25 بازيستىك تارماققا، ەۋروپا ورتالىق بانكى 3,5 پايىزعا دەيىن 50 بازيستىك تارماققا كوتەردى»، - دەدى عالىمجان ءپىرماتوۆ.
