كولىك پروكۋراتۋراسى الماتى اۋەجايىنىڭ كوممەرتسيالىق نىساندارىن مەملەكەت مەنشىگىنە قايتاردى

استانا. قازاقپارات - الماتى قالاسىنىڭ اۆياتسيالىق كولىك پروكۋراتۋراسى زاڭسىز شىعارىلعان مەملەكەتتىك اكتيۆتەردى قايتارۋ جونىندەگى جۇمىس شەڭبەرىندە الماتى حالىقارالىق اۋەجاي جولاۋشىلار تەرمينالىنىڭ كوممەرتسيالىق ءۇي- جايلارىن جەكە تۇلعالاردىڭ پايداسىنا زاڭسىز يەلىكتەن شىعارعانىن انىقتادى.

بۇل تۋرالى قازاقپارات باس كولىك پروكۋراتۋراسىنا سىلتەمە جاساپ حابارلايدى.

ماسەلەن، 2003 -جىلى «يمستالكوم» ا ق الماتى قالاسى اكىمدىگىنىڭ تاپسىرىسى بويىنشا جاڭا جولاۋشىلار تەرمينالىن سالدى. قۇرىلىس اياقتالعاننان كەيىن جاڭارتىلعان تەرمينالدىڭ ساۋدا الاڭدارىنىڭ ءبىر بولىگى مەردىگەرگە شارت بويىنشا 333 ميلليون تەڭگە مولشەرىندە قالعان سومانى وتەۋ ەسەبىنە ءوتتى.

سونىمەن قاتار، ىشكى مەملەكەتتىك اۋديتتىڭ ناتيجەسى بويىنشا قۇرىلىس سالۋشى الدىندا قانداي دا ءبىر بەرەشەك بولماعانى بەلگىلى بولدى.

اكىمدىككە وسى وبەكتىلەرگە مەنشىك قۇقىعىن قايتارۋ ءۇشىن اۆياتسيالىق كولىك پروكۋراتۋراسى تۇركسىب اۋداندىق سوتىنا جاۋاپكەر ا. باقتيار قىزىنا جالپى اۋدانى 1118,5 ش. م. جولاۋشىلار تەرمينالىنىڭ كوممەرتسيالىق ءۇي- جايلارىن يەلىكتەن شىعارۋعا بايلانىستى بارلىق ماملەلەردى جارامسىز دەپ تانۋ تۋرالى تالاپ ارىزبەن جۇگىندى.

سوتتىڭ 29.12.2022 -جىلعى شەشىمىمەن پروكۋراتۋرانىڭ تالاپ- ارىزى تولىق كولەمدە قاناعاتتاندىرىلدى. سوت اكتىسى ا. ج. 13-ناۋرىزىندا كۇشىنە ەندى.

«بۇگىنگى تاڭدا سوتتىڭ شەشىمىن ورىنداۋ اياسىندا مەنشىك قۇقىعىن الماتى قالاسى اكىمدىگىنە تىركەۋ «ازاماتتارعا ارنالعان ۇكىمەت» ا ق بويىنشا، ال ادىلەت دەپارتامەنتىمەن وبەكتىلەردى مەملەكەت پايداسىنا تىكەلەي بەرۋ جۇمىستارى باستالدى»، - دەلىنگەن باس كولىك پروكۋراتۋراسىنىڭ باسپا ءسوز قىزمەتى تاراتقان حابارلامادا.