قازاقستان - تۇركيا قارىم-قاتىناسى ستراتەگيالىق سەرىكتەستىك دەڭگەيىنە كوتەرىلدى - ەلشى
بۇل تۋرالى بۇگىن اقوردادا مەملەكەت باسشىسى قاسىم-جومارت توقايەۆقا سەنىم گراموتاسىن تاپسىرعاننان كەيىن تۇركيا رەسپۋبليكاسىنىڭ ەلشىسى مۋستافا كاپۋدجۋ ايتتى، دەپ حابارلايدى قازاقپارات ءتىلشىسى.
«قازىر عانا قۇرمەتتى پرەزيدەنت مىرزاعا سەنىم گراموتاسىن تابىس ەتتىم. ءبىز تاعى ءبىر مارتە رەسپۋبليكالارىمىز اراسىنداعى ىنتىماقتاستىقتىڭ نىعايا تۇسەتىندىگىن قۋاتتايمىز. قازاقستانداعى جۇمىسىم بارىسىندا ەكىجاقتى قارىم-قاتىناستى نىعايتۋ ءۇشىن بار كۇش-جىگەرىمدى جۇمسايمىن. تۇركيا قازاقستان رەسپۋبليكاسىنىڭ تاۋەلسىزدىگىن العاشقىلاردىڭ ءبىرى بولىپ مويىنداعان مەملەكەت جانە 31 جىل بويى ەكىجاقتى قارىم-قاتىناستى نىعايتىپ كەلەدى. تاياۋدا رەسپۋبليكالارىمىزدىڭ اراسىندا قول قويىلعان قۇجات قارىم-قاتىناسىمىزدى ستراتەگيالىق سەرىكتەستىك دەڭگەيىنە دەيىن كوتەرەدى. ءبىزدىڭ ىنتىماقتاستىعىمىز جەدەل قارقىنمەن داميتىنىنا سەنىمدىمىز. ويتكەنى، ءبىزدىڭ حالىقتارىمىزدىڭ ءتىلى، مادەنيەتى ۇقساس»، - دەدى تۇركيا ەلشىسى.
ەسكە سالايىق، قازاقستان پرەزيدەنتىنە سەنىم گراموتالارىن مالايزيا ەلشىسى موحاماد ادلي بين ابدۋللا، ساۋد ارابياسى كورولدىگىنىڭ ەلشىسى فايسال بەن حانيف ءال-كاحتاني، تۇركيا رەسپۋبليكاسىنىڭ ەلشىسى مۋستافا كاپۋدجۋ جانە يران يسلام رەسپۋبليكاسىنىڭ ەلشىسى ءالي اكبار دجوۋكار تاپسىرعان ەدى.
