پرەزيدەنت: فرانسيا - قازاقستاننىڭ جەتەكشى ساياسي جانە ەكونوميكالىق سەرىكتەستەرىنىڭ ءبىرى

استانا. قازاقپارات - مەملەكەت باسشىسى فرانسيا پرەزيدەنتىنىڭ ارناۋلى وكىلى يزابەل ديۋموندى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

قاسىم- جومارت توقايەۆقا ارناۋلى وكىل يزابەل ديۋمون فرانسيا پرەزيدەنتى ەممانيۋەل ماكروننىڭ حاتىن تابىس ەتتى.

قاسىم- جومارت توقايەۆ يزابەل ديۋمونعا ءىلتيپات بىلدىرە وتىرىپ، جولداعان يگى سالەمى ءۇشىن پرەزيدەنت ەممانيۋەل ماكرونعا العىس ايتتى. سونداي- اق فرانسيا قازاقستاننىڭ ەۋروپاداعى باستى ساياسي جانە ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى.

كەزدەسۋ بارىسىندا جوعارى دەڭگەيدە قول جەتكىزىلگەن ۋاعدالاستىقتاردى جۇزەگە اسىرۋعا باعىتتالعان ەكىجاقتى قاتىناستاردى ودان ءارى نىعايتۋ پەرسپەكتيۆالارى تالقىلاندى.

- وتكەن جىلى 29-قاراشادا فرانسيا پرەزيدەنتىمەن وتكەن كەزدەسۋدەن ۇلكەن اسەر الدىم. ءبىز 2 ساعاتتان استام ۋاقىت بەتپە- بەت فورماتىندا ەكىجاقتى قاتىناستار مەن ەلدەرىمىز اراسىنداعى ىنتىماقتاستىقتىڭ وزەكتى ماسەلەلەرى جونىندە اڭگىمەلەستىك. سونداي- اق حالىقارالىق ارەنادا قالىپتاسقان احۋال تۋرالى پىكىر الماستىق. فرانسيا - قازاقستاننىڭ جەتەكشى ساياسي جانە ەكونوميكالىق سەرىكتەستەرىنىڭ ءبىرى. ءبىز ەكى ەل اراسىنداعى ىنتىماقتاستىقتى، ءسىزدىڭ ەلىڭىزدىڭ حالىقارالىق ارەناداعى ءرولىن جانە فرانسيانىڭ ەكونوميكالىق الەۋەتىن جوعارى باعالايمىز. ءسىزدىڭ ەلىڭىز 2008 -جىلعى ماۋسىمدا ەۋروپالىق وداققا مۇشە مەملەكەتتەردىڭ اراسىندا ءبىرىنشى بولىپ قازاقستانمەن ستراتەگيالىق سەرىكتەستىك تۋرالى شارتقا قول قويدى. بيىل ءبىز وسى ماڭىزدى قۇجاتتىڭ ون بەس جىلدىعىن اتاپ وتەمىز. ەلدەرىمىز اراسىندا بارلىق دەڭگەيدە بەلسەندى جانە سەنىمدى ساياسي ديالوگ ورناعانىن تاعى دا اتاپ وتكىم كەلەدى، - دەدى مەملەكەت باسشىسى.

قاسىم- جومارت توقايەۆ ەكى ەل اراسىنداعى ساۋدا- ەكونوميكالىق، مادەني- گۋمانيتارلىق بايلانىستاردىڭ قارقىندى دامىپ كەلە جاتقانىنا جوعارى باعا بەردى. ونىڭ ايتۋىنشا، قازاقستان - فرانسيانىڭ ورتالىق ازياداعى باستى ساۋدا سەرىكتەسى. مەملەكەت باسشىسى پرەزيدەنت ەممانيۋەل ماكرونعا جۇرەكجاردى سالەمىن جولدادى جانە ونى قازاقستانعا ساپارمەن كەلۋگە شاقىردى.

- بۇل ساپار ەكونوميكالىق جانە ساياسي ىنتىماقتاستىققا تىڭ سەرپىن بەرەدى دەپ ويلايمىن. ەكى ەل اراسىندا ىسكە اسىرۋدى قاجەت ەتەتىن كوپتەگەن ۋاعدالاستىق بار. قازاقستاندا فرانسۋز كاپيتالىنىڭ ۇلەسى بار 170 كاسىپورىن جۇمىس ىستەيدى جانە جەتەكشى فرانسۋز كومپانيالارى قىزمەت ەتەدى. ءبىزدىڭ ەكونوميكامىزداعى فرانسۋز كومپانيالارىنىڭ قىزمەتىنە جان جاقتى قولداۋ كورسەتىلەدى، - دەدى پرەزيدەنت.

ءوز كەزەگىندە يزابەل ديۋمون فرانسيانىڭ قازاقستانمەن قارىم- قاتىناستى دامىتۋعا مۇددەلى ەكەنىن جەتكىزدى. ونىڭ ايتۋىنشا، فرانسيا قازاقستان پرەزيدەنتىنىڭ جۇرگىزىپ جاتقان رەفورمالار ساياساتىن تولىق قولدايدى. فرانسيا پرەزيدەنتىنىڭ ارناۋلى وكىلى قازاقستاننىڭ الەمدەگى قازىرگى كۇردەلى گەوساياسي جاعدايعا قاتىستى ۇستانىمىنا جوعارى باعا بەردى.

- سىزگە پرەزيدەنتىمنىڭ سالەمىن جەتكىزگىم كەلەدى. بىلتىر قاراشا ايىنىڭ سوڭىندا پاريجدەگى كەزدەسۋىڭىز تۋرالى ونىڭ وتە جاقسى پىكىردە ەكەنىن بىلەمىن. بۇل - ءبىز ءۇشىن وتە ماڭىزدى ءسات جانە سىزدەن ايماقتا نە بولىپ جاتقانى تۋرالى كوزقاراسىڭىزدى ەستۋ ماڭىزدى. ءسىزدىڭ ساپارىڭىز ەكى ەل اراسىنداعى ىنتىماقتاستىققا تىڭ سەرپىن بەردى. ءبىز بۇل ىنتىماقتاستىقتى ستراتەگيالىق سەرىكتەستىگىمىز نەگىزىندە جالعاستىرعىمىز كەلەدى. بۇل ءبىز ءۇشىن دە وتە ماڭىزدى، - دەدى يزابەل ديۋمون.

سونداي- اق ولار حالىقارالىق جانە ايماقتىق كۇن تارتىبىندەگى وزەكتى ماسەلەلەر بويىنشا پىكىر الماستى.