مەملەكەت باسشىسى مارات قارابايەۆقا ءبىرقاتار تاپسىرما بەردى

استانا. قازاقپارات - مەملەكەت باسشىسى يندۋستريا جانە ينفراقۇرىلىمدىق دامۋ ءمينيسترى مارات قارابايەۆتى قابىلدادى، دەپ حابارلايدى اقوردا.

كەزدەسۋدە مينيسترلىكتىڭ قىزمەتى جانە پرەزيدەنت تاپسىرمالارىنىڭ ورىندالۋ بارىسى، سونىڭ ىشىندە جولداردىڭ ساپاسىن جاقسارتۋ، حالىقتى تۇرعىن ۇيمەن قامتاماسىز ەتۋ ماسەلەلەرى جونىندە باياندالدى.

قاسىم-جومارت توقايەۆقا كەن ورىندارىنا جۇرگىزىلگەن تەكسەرۋ جۇمىستارىنىڭ قورىتىندىسى تۋرالى ەسەپ بەرىلدى. مارات قارابايەۆتىڭ ايتۋىنشا، زاڭبۇزۋشىلىقتارعا بايلانىستى قاتتى پايدالى قازبالاردى يگەرۋگە بەرىلگەن 200 دەن استام كەلىسىمشارت پەن ليتسەنزيا قايتارىپ الىندى.

مينيستر 800 دەن استام جوبادان تۇراتىن جاڭا يندۋستريالىق ينۆەستيتسيالىق جوبالار توپتاماسىنىڭ ىسكە اسىرىلۋى تۋرالى دا باياندادى.

بۇدان بولەك، مەملەكەت باسشىسىنا كولىك ينفراقۇرىلىمىنىڭ دامۋى جونىندە اقپارات بەرىلدى. ءتيىستى تاپسىرما بويىنشا ۇكىمەت ەلىمىزدىڭ كولىك- لوگيستيكالىق الەۋەتىن دامىتۋدىڭ 2030-جىلعا دەيىنگى تۇجىرىمداماسىن بەكىتتى. سونداي-اق ترانزيتتىك الەۋەتتى ارتتىرۋ ءۇشىن ۆاگون پاركى تاپشىلىعىنا قاتىستى ماسەلە شەشىلىپ جاتىر. «Stadler»، «Alstom» جانە «Wabtec» كومپانيالارىنىڭ قاتىسۋىمەن وتاندىق زاۋىتتاردا ۆاگون مەن لوكوموتيۆ ءوندىرىسى باستالادى.

پرەزيدەنتتىڭ 2029-جىلعا دەيىنگى سايلاۋالدى باعدارلاماسىن ىسكە اسىرۋ اياسىندا حالىقارالىق اۆتوموبيل دالىزدەرىن دامىتۋ، سونىڭ ىشىندە رەسپۋبليكالىق ماڭىزى بار 8 مىڭ شاقىرىم اۆتوجول سالۋ جانە قايتا جوندەۋ جۇمىستارى جۇرگىزىلىپ جاتىر.

قاسىم-جومارت توقايەۆقا ازاماتتىق اۆياتسيا سالاسىنداعى تۇراقتى ءوسىم تۋرالى دا باياندالدى. 2022-جىلى پاندەمياعا دەيىنگى كورسەتكىشكە قول جەتكىزىلدى، ياعني قازاقستان اۆياكومپانيالارى 11 ميلليونعا جۋىق جولاۋشى تاسىمالدادى. «اشىق اسپان» رەجيمى ەنگىزىلدى. ۇشۋ گەوگرافياسى كەڭەيىپ كەلەدى. 2025-جىلعا دەيىن توكيو، سينگاپۋر، شانحاي جانە نيۋ-يورك باعىتتارىنا رەيستەر اشىلادى دەپ جوسپارلانىپ وتىر.

قاسىم-جومارت توقايەۆ ورتا بيزنەستى دامىتۋ جانە شيكىزات سەكتورىنا، تاۋ-كەن ونەركاسىبى مەن گەولوگيالىق بارلاۋ سالالارىنا ينۆەستيتسيا تارتۋ جۇمىستارىن كۇشەيتۋدى تاپسىردى.

سونىمەن قاتار پرەزيدەنت جول بويىنداعى، سونداي-اق الەۋمەتتىك، ينجەنەرلىك جانە كوممۋنالدىق ينفراقۇرىلىمداردى جاڭعىرتۋعا ەرەكشە نازار اۋدارۋدى، وندىرىستەگى وتاندىق ۇلەستى ارتتىرۋ جۇمىسىن كۇشەيتۋدى جانە قالا قۇرىلىسى كودەكسىن ازىرلەۋدى جەدەلدەتۋدى تالاپ ەتتى.