قازاقستان مەن تۇركيا بىرلەسىپ ۆاكسينا ازىرلەۋ تۋرالى كەلىسىمگە قول قويماق
تاراپتاردىڭ بۇل باعىتتاعى جوسپارى باياندالعان كەلىسىم قۇجاتى «اشىق» ن ق ا پورتالىندا جاريالاندى، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنىڭ ۇكىمەتى مەن تۇركيا رەسپۋبليكاسىنىڭ ۇكىمەتى دەنساۋلىق ساقتاۋ سالاسىنداعى ىنتىماقتاستىقتى تەڭدىك جانە ءوزارا پايدا قاعيداتتارىن نەگىزگە الا وتىرىپ جەتىلدىرەدى جانە نىعايتادى»، - دەلىنگەن قۇجاتتا.
كەلىسىمدە جازىلعانداي، تاراپتار مىنا باعىتتار بويىنشا ىنتىماقتاستىقتى ارتتىرۋعا مۇددەلى:
- پاندەميانى قوسا العاندا، ينفەكتسيالىق جانە ينفەكتسيالىق ەمەس اۋرۋلارمەن كۇرەس؛
- مەديتسينا جۇمىسكەرلەرىن وقىتۋ مەن ولاردىڭ بىلىكتىلىگىن ارتتىرۋ جانە انا مەن بالا ءولىمىن بولعىزباۋ ءۇشىن جاڭا تۋعان نارەستەلەردى رەانيماتسيالاۋ باعدارلامالارىن ازىرلەۋ؛
- تۇركيانىڭ دەنساۋلىق ساقتاۋ مينيسترلىگى ق ر دەنساۋلىق ساقتاۋ مينيسترلىگىمەن بىرلەسىپ، تۇركياداعى جوعارى ءبىلىم كەڭەسىنىڭ اراسىندا وقىتۋشىلار قۇرامىنىڭ اكادەميالىق ۇتقىرلىعىن جۇزەگە اسىرۋعا بايلانىستى جاردەمدەسۋدى قامتاماسىز ەتەدى؛
- مەملەكەتتىك مەديتسينالىق ۇيىمداردىڭ اۋرۋحانالارىن باسقارۋ جۇيەسى؛
- دەنساۋلىق ساقتاۋ ستاتيستيكاسىن جاقسارتۋ؛
- مەديتسينالىق كورسەتىلەتىن قىزمەتتەردىڭ ساپاسى جانە دەنساۋلىق ساقتاۋ سالاسىنداعى اككرەديتتەۋ؛
- مەيىرگەرلىك قىزمەت بويىنشا ىنتىماقتاستىق؛
- فارماتسيەۆتيكالىق قىزمەت، مەديتسينالىق بۇيىمدار، جابدىقتار جانە ۆاكسينالاردى ازىرلەۋ سالاسىنداعى ىنتىماقتاستىق، اقپارات پەن تاجىريبە الماسۋ؛
- دەنساۋلىق ساقتاۋ سالاسىنداعى زاڭنامانى ازىرلەۋدە ءبىلىم مەن تاجىريبە الماسۋ؛
- تاجىريبە الماسۋ جانە بىرلەسكەن قىزمەتتى ودان ءارى دامىتۋ ماقساتىندا ساراپشىلار مەن دەنساۋلىق ساقتاۋ جۇمىسكەرلەرىمەن الماسۋعا ەرەكشە نازار اۋدارا وتىرىپ، ءوز ۇيىمدارىنىڭ اراسىنداعى تىكەلەي ىنتىماقتاستىقتى ءوزارا نىعايتۋ؛
- دۇنيەجۇزىلىك دەنساۋلىق ساقتاۋ ۇيىمىن، يسلام ىنتىماقتاستىق ۇيىمىن جانە تۇركى مەملەكەتتەرى ۇيىمىن قوسا العاندا، دەنساۋلىق ساقتاۋ سالاسىندا جۇمىس ىستەيتىن حالىقارالىق ۇيىمدارمەن ىنتىماقتاستىق؛
- مەملەكەتتىك-جەكەشەلىك ارىپتەستىكتى قوسا العاندا، ءارتۇرلى ينۆەستيتسيالىق مودەلدەر شەڭبەرىندە دەنساۋلىق ساقتاۋعا ينۆەستيتسيالار سالاسىندا جانە ىنتىماقتاستىق مۇمكىندىكتەرىن زەردەلەۋ، ازىرلەۋ، ەنگىزۋ جانە تاجىريبە الماسۋ؛
- مەملەكەتەردىڭ تسيفرلىق دەنساۋلىق ساقتاۋ سالاسىنداعى وزىق پراكتيكاسىن قولدانۋ جانە دامىتۋ.
وسى ىنتىماقتاستىق اياسىندا تاجىريبە الماسۋ ءۇشىن ەكى ەل ماماندارىنا كەزدەسۋلەر، بيزنەس- فورۋمدار، كورمەلەر، كونگرەستەر ۇيىمداستىرىلادى. وعان قاتىسۋعا باراتىن تاراپ ءوز دەلەگاتسياسىنىڭ شىعىندارىن تولىق وتەيدى.
«كەلىسىم 5 جىل بويى كۇشىندە قالادى. ەگەر تاراپتاردىڭ بىرەۋى ەكىنشى تاراپتى ءوزىنىڭ وسى كەلىسىمنىڭ قولدانىسىن توقتاتۋعا نيەتى تۋرالى ول اياقتالعانعا دەيىن التى 6 اي بۇرىن ديپلوماتيالىق ارنالار ارقىلى جازباشا نىساندا حاباردار ەتپەسە، وسى كەلىسىم كەلەسى 1 جىلعا اۆتوماتتى تۇردە ۇزارتىلادى»، - دەپ جازىلعان كەلىسىم جوباسىندا.
قۇجات 18- ساۋىرگە دەيىن كوپشىلىك تالقىلاۋدا بولادى. كەيىن قول قويۋ ءۇشىن ەكى ەلدىڭ ۇكىمەت باسشىلارىنا جولدانادى.
