شاعىن جانە ورتا بيزنەس يەلەرى جاپونيادا تاعلىمدامادان وتە الادى

استانا. قازاقپارات - ەلدەگى شاعىن جانە ورتا بيزنەس يەلەرىنە جاپونيادا تاعلىمدامادان ءوتۋ مۇمكىندىگى بەرىلەدى، دەپ حابارلايدى قازاقپارات ءتىلشىسى.

بۇل تۋرالى ۇلتتىق ەكونوميكا مينيسترلىگى كاسىپكەرلىكتى مەملەكەتتىك قولداۋ دەپارتامەنتى ديرەكتورىنىڭ ورىنباسارى مەرەي يسايەۆا BUSINESS TECHNOLOGY EXPO 2023 حالىقارالىق كورمەسىنىڭ اياسىندا ءوتىپ جاتقان بيزنەس-فورۋمدا ءمالىم ەتتى.

«قولداۋدىڭ قارجىلاي ەمەس تۇرلەرى بيزنەستى اقپاراتپەن، ساراپتامامەن قامتۋعا باعىتتالادى. وسىلايشا شاعىن جانە ورتا بيزنەس نىساندارىنا رۇقسات الۋعا، شەتەلدىك ارىپتەستەرىمەن ىسكەرلىك بايلانىستى جولعا قويۋعا كومەك كورسەتىلەدى. جىل سايىن جەتەكشى كاسىپكەرلەردى گەرمانياعا ەكى اپتالىق بيزنەس-تاعلىمداماعا جىبەرىپ كەلەمىز. بيىلدان باستاپ جاپونياعا 10 كاسىپكەردى تاعلىمداماعا جىبەرەمىز. سونداي-اق، وڭتۇستىك كورەيامەن دە وسى ماسەلە پىسىقتالىپ جاتىر»، - دەدى مەرەي يسايەۆا.

ونىڭ ايتۋىنا قاراعاندا، «بيزنەستىڭ جول كارتاسى» مەن «قاراپايىم زاتتار ەكونوميكاسى» باعدارلاماسى ىسكە اسقان بۇكىل كەزەڭنىڭ ىشىندە شاعىن جانە ورتا بيزنەس نىساندارى 119 مىڭ جۇمىس ورنىن قۇرعان.

50 تريلليون تەڭگەنىڭ ءونىمىن شىعارىپ، بيۋجەتكە 3 تريلليون تەڭگە تولەدى.

«بيىلدان باستاپ «مەن كاسىپكەرمىن» دەيتىن جاڭا قۇرال پايدا بولدى. بۇل ارقىلى ءىسىن جاڭا باستاعان كاسىپكەرلەرگە بيزنەستىڭ الىپپەسىن ۇيرەتىپ، سەرتيفيكات بەرەمىز. ايەلدەر كاسىپكەرلىگىنە ارنالعان جەكە باعىت بار. سونىڭ اياسىندا 7 قوسالقى قىزمەت كورسەتەمىز. ونىڭ ىشىنە كونسۋلتاتسيا، بيزنەس-تالىمگەرلىك، سالالىق وقىتۋ سياقتى اسا قاجەتتى شارالار كوزدەلگەن. سونداي-اق، بيزنەستى حالىقارالىق ستاندارتتارعا ساي باعالاۋ قىزمەتى بار. حالىقارالىق تاجىريبەگە قاراپ قازاقستاندا شاعىن جانە ورتا بيزنەسكە كورسەتىلەتىن قولداۋدىڭ تەڭدەسسىز ەكەنىن ايتۋعا بولادى»، - دەدى ۇ ە م وكىلى.