نۇرتاي سابيليانوۆ اباي مەن ش ق و جولدارىن جوندەۋ ماسەلەسىن كوتەردى

استانا. قازاقپارات - ءماجىلىستىڭ جالپى وتىرىسىندا دەپۋتات نۇرتاي سابيليانوۆ اباي مەن شىعىس قازاقستان وبلىستارىنىڭ جولدارىن جوندەۋ ماسەلەسىن كوتەردى، دەپ حابارلايدى قازاقپارات ءتىلشىسى.

«اباي جانە شىعىس قازاقستان وبلىستارىندا حالىقپەن كەزدەسۋلەر وتكىزگەندە جول جوندەۋ ماسەلەسى ءجيى كوتەرىلدى. مىسالى، «قالباتاۋ - مايقاپشاعاي» جانە «قالباتاۋ - اياگوز - ءۇشارال» رەسپۋبليكالىق ماڭىزى بار جول ۋچاسكەلەرىن جوندەۋ وسى كۇنگە دەيىن تولىق اياقتالماعان. بۇل جولدار حالىققا قيىندىق تۋعىزىپ وتىر. اسىرەسە، ۇشبيىك - اياگوز 92 شاقىرىم ارالىعىنداعى جولدا ءجۇرۋ قيىنعا سوعۋدا. سونىمەن قاتار، «سەمەي- قاينار» جانە «قاراعاندى- اياگوز- بوعاس» رەسپۋبليكالىق ماڭىزى بار جولداردى جوندەۋ جۇمىسى توقتاپ قالعان»، - دەدى پرەمەر- ءمينيستردىڭ ءبىرىنشى ورىنباسارى رومان سكلياردىڭ اتىنا دەپۋتاتتىق ساۋال جولداعان نۇرتاي ءسابيليانوۆ

سونداي- اق، ول اياگوز اۋدانىنىڭ اقتوعاي كەنتىنەن رەسپۋبليكالىق ماڭىزى بار جولعا دەيىنگى 85 شاقىرىم جولدىڭ جاعدايى وتە ناشار، توزعانىن اتاپ ءوتتى.

«وسىعان بايلانىستى سىزدەن «قالباتاۋ - مايقاپشاعاي» جانە «قالباتاۋ - اياگوز - ءۇشارال» رەسپۋبليكالىق ماڭىزى بار جول ۋچاسكەلەرىن جوندەۋدى اياقتاپ، «سەمەي - قاينار» جانە «قاراعاندى- اياگوز- بوعاس» رەسپۋبليكالىق ماڭىزى بار جولداردى تولىق جوندەۋدى، اقتوعاي كەنتىنەن رەسپۋبليكالىق ماڭىزى بار جولعا دەيىنگى 85 شاقىرىم جولعا كۇردەلى جوندەۋ جۇمىسىن جۇرگىزۋدى سۇرايمىز. سونىمەن قاتار، وسى جولداردى جوندەۋگە بولىنەتىن قاراجاتتىڭ ءتيىمدى پايدالانۋىن قامتاماسىز ەتۋ كەرەك»، - دەدى ءماجلىس دەپتۋتاتى.

اۆتور

مارلان جيەمباي