ەلىمىزدىڭ تەرريتوريالىق تۇتاستىعىنا نۇقسان كەلتىرۋگە قابىلەتتى توپتارعا قۇقىقتىق تەكسەرۋ جۇرگىزۋ قاجەت - سايروۆ

استانا. قازاقپارات - ەلىمىزدىڭ مەملەكەتتىك بۇلجىماستىعى مەن تەرريتوريالىق تۇتاستىعىنا نۇقسان كەلتىرۋگە قابىلەتتى توپتارعا قاتىستى قۇقىقتىق تەكسەرۋ جۇرگىزۋ قاجەت. بۇل تۋرالى ءماجىلىستىڭ جالپى وتىرىسىندا دەپۋتات ەرلان سايروۆ ايتتى، دەپ حابارلايدى قازاقپارات ءتىلشىسى.

«پەتروپاۆل قالاسىنداعى ءبىرقاتار ازاماتتىڭ قازاقستان رەسپۋبليكاسىنىڭ كونستيتۋتسياسىنا قايشى كەلەتىن مالىمدەمەلەرى قوعام اراسىندا رەزونانس تۋعىزىپ، بۇكىل حالىقتىڭ مازاسىن الۋدا. بۇل وقيعا ەلىمىزدەگى قۇقىقتىق سانا جانە قوعامدىق پروتسەسستەر سالاسىنداعى فۋندامەنتالدى پروبلەمالاردىڭ بار ەكەندىگىن كورسەتەدى. ازاماتتار وزدەرىنىڭ ءىس- قادامدارى ءۇشىن ناقتى زاڭ الدىندا قاتاڭ جاۋاپ بەرەتىندىگىن سەزىنىپ، ءتۇسىنۋى ءتيىس! قۇقىقتىق مەملەكەت دەگەنىمىز - زاڭ جانە ءتارتىپ! قازاقستان رەسپۋبليكاسى كونستيتۋتسياسىنا سايكەس، ءىس- ارەكەتتەرى مەملەكەتتىڭ تەرريتوريالىق تۇتاستىعىن بۇزۋعا باعىتتالعان قوعامدىق بىرلەستىكتەر قۇرۋعا جانە ولاردىڭ قىزمەتىنە تىيىم سالىنعان. قازاقستان رەسپۋبليكاسى قىلمىستىق كودەكسىندە قازاقستان رەسپۋبليكاسىنىڭ تۇتاستىعىن بۇزۋعا جاريا تۇردە شاقىرۋ ارەكەتتەرىنە اۋىر جازا قاراستىرىلعان. بۇل وقيعا ەلىمىزدىڭ اقپاراتتىق- قوعامدىق سالاسىندا دا تەرەڭ پروبلەمالاردىڭ دا بار ەكەندىگىن كورسەتتى»، - دەپ اتاپ وتەدى باس پروكۋرور مەن ۇلتتىق قاۋىپسىزدىك كوميتەتى ءتوراعاسىنىڭ اتىنا دەپۋتاتتىق ساۋال جولداعان ەرلان سايروۆ.

ونىڭ اتاپ وتۋىنشە، ازاماتتاردىڭ مەملەكەتتىك ءوزىن-ءوزى سەزىنۋ ماسەلەسىمەن ەشبىر مەملەكەتتىك ورگان جۇيەلى اينالىسىپ وتىرعان جوق. مەملەكەتتىڭ جانە شەكارالىق ايماقتارداعى اقپاراتتىق قاۋىپسىزدىك پروبلەماسى ۋشىعىپ تۇر. قازاقستاندا تۇراتىن بارلىق ۇلت وكىلدەرىنە الەۋمەتتىك- ەكونوميكا، ساياسات سالاسىندا وزدەرىن كورسەتۋگە، بەيبىت، لايىقتى ءومىر سۇرۋگە بارلىق جاعداي جاسالعان. سوندىقتان، قازاقستاننىڭ ءار- ءبىر ازاماتى مەملەكەتتىڭ بىرلىگى مەن ەلىمىزدىڭ تەرريتوريالىق تۇتاستىعى ءۇشىن ايانباي ەڭبەك ەتىپ، كۇرەسۋى كەرەك.

«بۇل بارلىعىمىزدىڭ پەرزەنتتىك پارىزىمىز! قازاقستاندا سەپاراتيزمگە جول جوق. بۇل ەلىمىزدىڭ بارشا ازاماتتارىنىڭ تالاپ- تىلەگى! AMANAT پارتياسى فراكسياسى مۇشەلەرى ۇكىمەت قۇزىرلى ورگاندارمەن بىرلەسە وتىرىپ، كەلەسى جەدەل قادامدار جاساۋى ماڭىزدى دەپ ەسەپتەيدى. بىرىنشىدەن، قۇزىرلى ورگاندار ەلىمىزدىڭ مەملەكەتتىك بۇلجىماستىعى مەن تەرريتوريالىق تۇتاستىعىنا نۇقسان كەلتىرۋگە قابىلەتتى جاسىرىن، جاسىرىن ەمەس توپتارعا قاتىستى قۇقىقتىق تەكسەرۋ جۇرگىزىپ، ولاردىڭ تامىرىنا بالتا شابۋ قاجەت. ەكىنشى، حالىق اراسىندا قۇقىقتىق اعارتۋ جۇرگىزە وتىرىپ، ازاماتتاردىڭ ءار-ءبىر ءسوزى مەن قادامىنىڭ قۇقىقتىق تەرەڭ سالدارى جونىندە ەسكەرتۋ وتە ماڭىزدى. ءۇشىنشى، جاستار، ەرەسەكتەر اراسىندا قازاقستاندىق پاتريوتيزم، مەملەكەتتىك مۇددە قۇندىلىقتارىن ۋاعىزدايتىن كونتسەپتۋالدىق باعىت- باعدار جاساۋ ۋاقىت تالابى. تورتىنشە، شەكارالىق ايماقتاردا قازاقستان مەملەكەتىنىڭ اقپاراتتىق كۇش- قۋاتىن ارتتىراتىن تەتىكتەر جاساۋ قاجەت. بەسىنشە، ازاماتتاردىڭ قازاقستاندىق مەملەكەتتىك ءوزىن- ءوزى سەزىنۋ مادەنيەتىن قالىپتاستىرۋ ءۇشىن ناقتى قادامدار دايىنداۋ كەزەك كۇتتىرمەيدى»، - دەدى ءماجىلىس دەپۋتاتى.

اۆتور

مارلان جيەمباي