جەمقورلىققا يتەرمەلەيتىن جۇيەلى سەبەپتەر مەن جاعدايلاردى جويۋ ماڭىزدى - پرەزيدەنت

استانا. قازاقپارات - مەملەكەت باسشىسى سىبايلاس جەمقورلىققا قارسى ءىس- قيمىل اگەنتتىگىنىڭ باسشىلىق قۇرامىمەن كەڭەس وتكىزدى، دەپ حابارلايدى قازاقپارات اقورداعا سىلتەمە جاساپ.

پرەزيدەنت سىبايلاس جەمقورلىققا قارسى ءىس- قيمىل اگەنتتىگىنىڭ باسشىلىق قۇرامىمەن بەينەبايلانىس ارقىلى كەڭەس وتكىزىپ، جاڭادان تاعايىندالعان ءتوراعا اسحات جۇماعاليدى تانىستىردى.

قاسىم- جومارت توقايەۆ اگەنتتىكتىڭ بۇرىنعى ءتوراعاسى ولجاس بەكتەنوۆكە اتقارعان جۇمىسى ءۇشىن ريزاشىلىعىن ءبىلدىرىپ، ونىڭ جاڭا قىزمەتىنە تابىس تىلەدى.

مەملەكەت باسشىسى اگەنتتىكتىڭ جاڭا باسشىلىعى مەن جەكە قۇرامىنا الداعى كەزەڭگە ارنالعان ءبىرقاتار مىندەت جۇكتەدى.

پرەزيدەنتتىڭ ايتۋىنشا، سىبايلاس جەمقورلىققا قارسى ساياساتتىڭ 2022-2026 -جىلدارعا ارنالعان تۇجىرىمداماسىندا كورسەتىلگەن شارالاردى تولىق جۇزەگە اسىرۋ كەرەك.

جوعارى لاۋازىمدى شەنەۋنىكتەر اراسىنداعى، اسىرەسە، حالقىمىزدىڭ ءال- اۋقاتىنا تىكەلەي اسەر ەتەتىن سالالارداعى جەمقورلىقتى انىقتاۋ جانە ونىڭ جولىن كەسۋ جونىندەگى قاتاڭ ءتاسىلدى جالعاستىرعان ءجون.

پرەزيدەنت جەمقورلىققا يتەرمەلەيتىن جۇيەلى سەبەپتەر مەن جاعدايلاردى جويۋ ماڭىزدى ەكەنىنە نازار اۋداردى. ونىڭ ايتۋىنشا، اقپاراتتىق- ءتۇسىندىرۋ جۇمىستارىن ءتيىستى دەڭگەيدە جۇرگىزۋ كەرەك.

مەملەكەت باسشىسىنشا ايتۋىنشا، تەرگەۋ جۇمىستارىنىڭ ناتيجەسىندە اگەنتتىك قۇنى 108 ميلليارد تەڭگە كولەمىندەگى شىعىندى قايتارا الدى. بۇل - وڭ ناتيجە.

ءبىراق سونىمەن قاتار بۇل وتكەن كەزەڭدەردە جەمقورلىق قانشالىقتى بەلەڭ العانىن كورسەتەدى.

- جەمقورلىقتىڭ بارلىق تۇرىمەن ىمىراسىز كۇرەس - مەملەكەتىمىزدىڭ ودان ءارى دامۋىنىڭ باسىمدىعى. پاراقورلىق، تامىر- تانىستىق، قوڭىراۋ شالۋ ارقىلى ماسەلە شەشۋ جانە تاعى باسقا كەلەڭسىزدىكتەر جىلدار بويى ازاماتتاردىڭ مەملەكەتتىك ينستيتۋتتارعا دەگەن سەنىمىنە سەلكەۋ تۇسىرگەنىن بىلەسىزدەر. وسى ورايدا حالىقتىڭ ادىلدىككە دەگەن ءۇمىتى ازايا باستادى. سوندىقتان مەنىڭ سايلاۋ الدىندا بەرگەن ۋادەلەرىمنىڭ ءبىرى جەمقورلىقتى تۇبىرىمەن جويعانشا ىمىراسىز كۇرەس جۇرگىزۋ بولدى. بۇل ىستە سىبايلاس جەمقورلىققا قارسى ءىس- قيمىل اگەنتتىگى شەشۋشى ءرول اتقارادى. 2019 -جىلى ماۋسىمدا قۇرىلعان ساتتەن بەرى اتالعان ورگان كوپتەگەن جۇمىس اتقاردى. ونى مويىنداۋ كەرەك. جەمقورلىققا قارسى كۇرەس شارالارىنىڭ جۇيەسى بەلسەندى دامي باستادى. اتاپ ايتقاندا، جاڭا قۇقىقتىق ينستيتۋتتار، وزىنە باعىنىشتى قىزمەتكەرلەردىڭ جەمقورلىق قىلمىسى ءۇشىن ساياسي جانە مەملەكەتتىك تۇلعالاردىڭ قىزمەتتەن كەتۋى، ادالدىققا تەكسەرىس، نورماتيۆتىك- قۇقىقتىق اكتىلەرگە جەمقورلىققا قارسى جۇرگىزىلەتىن ساراپتاما جانە تاعى دا باسقا باستامالار وسى ساناتقا كىرەدى. ولاردىڭ العاشقى ناتيجەلەرىن كورىپ وتىرمىز، - دەدى قاسىم- جومارت توقايەۆ.

رەداكتور

جانات قاپالبايەۆا