ماجىلىسكە زاڭ قابىلداۋ وكىلەتتىگى تولىق بەرىلدى - ەرلان قوشانوۆ
«مەملەكەت باسشىسىنىڭ رەفورمالارىنىڭ ناتيجەسىندە ەلدەگى نەگىزگى ساياسي ينستيتۋتتاردىڭ بارلىعى جاڭعىردى. وتكەن ءماجىلىس سايلاۋى سول جاڭارۋدىڭ سوڭعى ساتىسى بولدى. وعان دالەل ماجىلىستە العاش رەت 6 ساياسي پارتيا جانە ءبىرمانداتتى وكرۋگتەن سايلانعان دەپۋتاتتار وتىر. ءبىزدىڭ باعدارلامالارىمىز بەن كوزقاراسىمىز ءارتۇرلى بولعانىمەن ەلدىڭ مۇددەسى، مەملەكەتتىڭ مۇددەسى ماسەلەلەرىنە كەلگەندە ءبارىمىزدىڭ ويىمىز دا، مىندەتىمىز دە ورتاق. سوندىقتان الدىمىزداعى ماقسات- مىندەتتەردى تىزە قوسىپ، بىرگە اسىرۋىمىز كەرەك دەپ ەسەپتەيمىن. كۇن سايىن جۇمىسىمىزدىڭ قارقىنى دا، سالماعى دا ارتا تۇسپەك»، - دەدى ەرلان قوشانوۆ.
سونىمەن قاتار ول زاڭ شىعارۋ ماسەلەسىنە دە توقتالدى.
«ءبىزدىڭ نەگىزگى جۇمىسىمىز - ساپالى جانە ناقتى جۇمىس ىستەيتىن زاڭداردى قابىلداۋ. پرەزيدەنت قاسىم- جومارت توقايەۆ وسى شاقىرىلىمنىڭ ءبىرىنشى سەسسياسىندا جاڭا پارلامەنتتىڭ الدىندا تۇرعان مىندەتتەردىڭ اۋقىمدىلىعىنا توقتالعان بولاتىن. ونىڭ ىشىندە مەملەكەت باسشىسى ەلىمىزدىڭ قارقىندى دامۋى ءۇشىن الداعى 5 جىلدا ساپالى زاڭنامالىق نەگىز جاساۋدى تاپسىردى. بۇل ءۇشىن بارلىق العىشارت جاسالعان. ماجىلىسكە زاڭ قابىلداۋ وكىلەتتىلىگى بۇگىندە تولىق بەرىلدى. ەندى جۇك تە جاۋاپكەرشىلىك تە بىزگە تۇسەدى دەگەن ءسوز. سوندىقتان دەپۋتاتتار ۇيلەسىمدى، ءتيىمدى جانە جۇيەلى جۇمىس ىستەۋى كەرەك»، - دەدى ول.
پالاتا ءتوراعاسى قازىر ماجىلىستە 50-گە جۋىق زاڭ جوباسى قارالىپ جاتقانىن اتاپ ءوتتى.
«مەملەكەت باسشىسىنىڭ تاپسىرماسى بويىنشا جۋىق ارادا تاعى دا ءبىرقاتار زاڭ جوباسى بىزگە كەلىپ تۇسەدى. ءبىز ولاردى تەز ءارى ساپالى تۇردە قابىلداۋىمىز كەرەك. بۇدان بولەك، دەپۋتاتتاردا زاڭ شىعارۋعا باستاماشى بولۋعا وكىلەتتىگىمىز بار. سول مۇمكىندىكتى ءبىز تولىق پايدالانۋىمىز كەرەك. ونىڭ ۇستىنە ءبىز ءبارىمىز وڭىرلەردى ارالاپ كەلدىك. كوپتەگەن دەپۋتات سول وڭىرلەردەن قىزمەت اتقارىپ كەلدى. ءبىز بارلىق تۇيتكىلدى جاقسى بىلەمىز دەپ ايتا الامىن. وزەكتى ماسەلەلەردى دە ءبىز جاقسى بىلەمىز. سوندىقتان دەپۋتاتتار بەلسەندىلىگىن بارىنشا ارتتىرىپ، وسى ماسەلەلەردى زاڭنامالىق تۇردە رەتتەۋگە ات سالىسادى دەپ ويلايمىن»، - دەدى ءماجىلىس سپيكەرى.
اۆتور
مارلان جيەمباي
