وتاندىق عالىمدارعا جاڭا سىيلىقتار تاعايىندالادى

استانا. قازاقپارات - وتاندىق عالىمدارعا ۇزدىك عىلىمي جۇمىستارى مەن زەرتتەۋ سالاسىنداعى زور جەتىستىكتەرى ءۇشىن جاڭا سىيلىقتار مەن مەملەكەتتىك ستيپەنديالار تاعايىندالماق.

بۇل تۋرالى «اشىق» ن ق ا پورتالىندا جاريالانعان عىلىم جانە جوعارى ءبىلىم ءمينيسترىنىڭ ءتيىستى بۇيرىق-جوباسىندا جازىلعان، دەپ حابارايدى قازاقپارات ءتىلشىسى.

ۆەدومستۆو باسشىسىنىڭ بۇيرىعىنا ساي، ەندى عالىمدارعا جىل سايىن مىنا سىيلىقتار تاعايىندالادى:

- جاراتىلىستانۋ عىلىمدارى سالاسىنداعى ۇزدىك عىلىمي زەرتتەۋ ءۇشىن ق. ي. ساتبايەۆ اتىنداعى 1 سىيلىق؛

- گۋمانيتاريا عىلىمدارى سالاسىنداعى ۇزدىك عىلىمي زەرتتەۋ ءۇشىن ش. ش. ءۋاليحانوۆ اتىنداعى 1 سىيلىق؛

- اگرارلىق عىلىم سالاسىنداعى ۇزدىك عىلىمي زەرتتەۋ مەن جۇمىس ءۇشىن ا. ي. بارايەۆ اتىنداعى 3 سىيلىق؛

- پەداگوگيكا سالاسىنداعى ۇزدىك عىلىمي زەرتتەۋ مەن جۇمىس ءۇشىن ى. التىنسارين اتىنداعى 1 سىيلىق؛

- تۇركولوگيا سالاسىنداعى اسا زور جەتىستىكتەرى ءۇشىن كۇلتەگىن اتىنداعى 1 سىيلىق؛

- جاراتىلىستانۋ عىلىمدارى سالاسىنداعى ۇزدىك جۇمىسى ءۇشىن جاس عالىمدارعا ارنالعان د. ا. قونايەۆ اتىنداعى 1 سىيلىق؛

- گۋمانيتاريا عىلىمدارى سالاسىنداعى ۇزدىك جۇمىس ءۇشىن جاس عالىمدارعا ارنالعان م. و. اۋەزوۆ اتىنداعى 1 سىيلىق.

سونىمەن قوسا، 75 مەملەكەتتىك عىلىمي ستيپەنديا تاعايىندالادى. ونىڭ 50 ءى جاسى 35 كە دەيىنگى تالانتتى جاس عالىمدارعا بەرىلەدى.

«جىل سايىنعى سىيلىقتاردى جانە مەملەكەتتىك عىلىمي ستيپەنديانى الۋعا ۇزدىك عىلىمي زەرتتەۋلەرى مەن جۇمىستارى، عىلىم سالاسىنداعى اسا زور جەتىستىكتەرى ءۇشىن عىلىمي قىزمەتكەرلەر ۇسىنىلۋى مۇمكىن. سىيلىقتاردى الۋ ءۇشىن جۇمىستار ۇسىنۋ قۇقىعى مەنشىك نىسانىنا قاراماستان قر عىلىمي ۇيىمدارىنىڭ جانە جوعارى نەمەسە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ كونسۋلتاتيۆتىك- كەڭەسشى ورگاندارىنا جىبەرىلەدى. سىيلىق الۋعا جەكە اۆتورلار، سونداي-اق سانى 5 ادامنان اسپايتىن اۆتورلار ۇجىمىنىڭ جۇمىستارى ۇسىنىلۋى مۇمكىن. ءار اۆتور جانە اۆتورلار ۇجىمى كونكۋرسقا تەك 1 جۇمىس ۇسىنۋعا قۇقىلى. بۇرىن رەسپۋبليكالىق بيۋدجەت قاراجاتىنان تولەنەتىن سىيلىقتارعا يە بولعان جۇمىستار وسى سىيلىقتاردى الۋ كونكۋرسىنا قاتىسۋعا جىبەرىلمەيدى. سىيلىققا الۋ ءۇشىن جۇمىس 2 رەتتەن ارتىق ۇسىنىلمايدى. ۇجىمدىق جۇمىستاردىڭ اۆتورلارىنا سىيلىقتىڭ اقشالاي بولىگى تەڭ ۇلەسپەن تولەنەدى»، - دەلىنگەن قۇجاتتا.

قۇجاتتاردى قاراۋ جانە سىيلىقتاردى تاعايىنداۋ بويىنشا كونكۋرستىق كوميسسيا قۇرىلادى جانە سونىڭ شەشىمى نەگىزىندە جەڭىمپازدار انىقتالادى.

بۇيرىق جوباسى 18- ساۋىرگە دەيىن كوپشىلىك تالقىلاۋدا بولادى.