قازاقستاندىقتاردى مەديتسينا ماماندارىمەن قامتۋ ۇلەسى - ەۋرووداق دەڭگەيىندە

استانا. قازاقپارات - قازاقستان تۇرعىندارىن مەديتسينا ماماندارىمەن قامتۋ دەڭگەيى ەۋرووداق كورسەتكىشىمەن سايكەس كەلەدى.

بۇل تۋرالى دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى قازاقپارات ءتىلشىسى.

«مەديتسينا ماماندارىنىڭ قىزمەتى ۇنەمى تاۋەكەلگە الىپ كەلەدى. ولاردىڭ جۇمىسى كۇردەلى ءارى جاۋاپكەرشىلىگى جوعارى. بۇگىندە ەلىمىزدە دەنساۋلىق ساقتاۋ سالاسىندا 267 مىڭ مەديتسينا قىزمەتكەرى ەڭبەكتەنىپ جاتىر. ونىڭ ىشىندە 78 مىڭنان استام دارىگەر جانە 188800 ورتا مەديتسينا قىزمەتكەرى بار. 10 مىڭ تۇرعىنعا شاققاندا دارىگەرلەرمەن قامتاماسىز ەتۋ 40,9 پايىز، ال ورتا مەديتسينا قىزمەتكەرلەرىمەن قامتۋ 98,7 قۇرايدى. بۇل ەۋرووداق ەلدەرىنىڭ كورسەتكىشتەرىمەن سايكەس كەلەدى»، - دەدى اجار عينيات ۇكىمەت وتىرىسىندا بايانداما جاساي وتىرىپ.

ءمينيستردىڭ مالىمەتىنشە، دەگەنمەن، دەنساۋلىق ساقتاۋ جۇيەسىندە كادر جەتىسپەۋشىلىگى بار. اتاپ ايتقاندا، 7621 مامان تاپشى. ونىڭ ىشىندە 3916 دارىگەر جانە 3705 ورتا مەديتسينا قىزمەتكەرى.

«مەديتسينا كادرلارىنىڭ كاسىبيلىك دەڭگەيىن ۇزدىكسىز كوتەرۋ ماقساتىندا تالىمگەرلىك ينستيتۋتىنىڭ جۇمىسى جالعاسىن تابادى. سونىمەن قاتار جەرگىلىكتى اتقارۋشى ورگاندار قاراجاتى ەسەبىنەن قوسىمشا جاردەماقى تولەنە بەرەدى. سول سياقتى دەنساۋلىق ساقتاۋ ماماندارىن تۇرعىن ۇيلەر جانە جاتاقحانالار سالۋدى جۇزەگە اسىرۋ، باسپانانى جالعا بەرۋ جانە باسقا دا شارالار ىسكە اسىرىلادى»، - دەيدى ول.

بۇعان دەيىن ەلىمىزدە مەديتسينا مەكەمەسى عيماراتتارىنىڭ 44,7 پايىزى توزعانى تۋرالى حابارلاعان ەدىك.