گازدىڭ الەۋمەتتىك ءادىل قۇنى بەلگىلەنەدى - ۇلتتىق ەكونوميكا مينيسترلىگى

استانا. قازاقپارات - گازدىڭ الەۋمەتتىك ءادىل قۇنى بەلگىلەنەدى. بۇل تۋرالى ۇكىمەت وتىرىسىندا پرەزيدەنتتىڭ ق ر پارلامەنتى سەسسياسىنىڭ اشىلۋىندا بەرگەن تاپسىرمالارىن ىسكە اسىرۋ بارىسىن تالقىلاۋ كەزىندە ۇلتتىق ەكونوميكا ءمينيسترىنىڭ مىندەتىن اتقارۋشى الىبەك قۋانتىروۆ ايتتى، دەپ حابارلايدى قازاقپارات ءتىلشىسى.

«مەملەكەت باسشىسى تاۋارلىق گازدىڭ ەنەرگيا تيىمدىلىگىن ارتتىرۋ جانە ۇتىمدى پايدالانۋ ءۇشىن ءتيىستى جوسپار قابىلداۋدى تاپسىردى. اتالعان مىندەتتى ىسكە اسىرۋ ءۇشىن ءىرى كوممەرتسيالىق كاسىپورىندارعا سارالانعان تاريفتەردى ەنگىزۋ، حالىق ءۇشىن كوتەرمە باعالاردىڭ وڭىرلىك ايىرماشىلىعىن قىسقارتۋ جانە تۇتىنۋ كولەمى بويىنشا سارالانعان تاريفتەردى ەنگىزۋ شارالارى ۇسىنىلادى. بۇل ءوز كەزەگىندە گازدى ۇنەمدى پايدالانۋعا، ىشكى تۇتىنۋ كولەمىنىڭ تاپشىلىعىن ازايتۋعا جانە گازدىڭ الەۋمەتتىك ءادىل قۇنىن بەلگىلەۋگە ىقپال ەتەدى»، - دەدى ءا. قۋانتىروۆ.

ايتا كەتەيىك، مەملەكەت باسشىسى جان- جاقتى جاڭعىرتۋ بويىنشا ناقتى مىندەتتەردى قويعان بولاتىن. سونىڭ ىشىندە الەۋمەتتىك- ەكونوميكالىق دامۋعا تىڭ سەرپىن بەرۋ قاجەت ەكەنىن اتاپ ءوتتى. ۇلتتىق ەكونوميكا مينيسترلىگىنىڭ مالىمەتىنشە، پرەزيدەنتتىڭ تاپسىرمالارىن ىسكە اسىرۋ ماقساتىندا 8 باعىت بويىنشا 32 شارادان تۇراتىن ءىس- شارالار جوسپارى پرەزيدەنت اكىمشىلىگىندە كەلىسۋدەن ءوتىپ جاتىر.

اۆتور

رۋسلان عابباسوۆ