قازاقستاندا سوت پەن پاسپورت باج ستاۆكالارى وزگەرەدى

استانا. قازاقپارات - مەملەكەتتىك باج ستاۆكالارىنا وزگەرىستەر ەنگىزىلدى. بۇل تۋرالى قازاقپارات مەملەكەتتىك كىرىستەر كوميتەتىنە سىلتەمە جاساپ حابارلايدى.

كوميتەت تاراتقان اقپاراتقا قاراعاندا، مۇلىكتىك سيپاتتاعى تالاپ ارىزداردان سوتتاردا مەملەكەتتىك باج سوماسىنىڭ جوعارعى شەگى بەلگىلەندى:

جەكە تۇلعالار ءۇشىن - تالاپ قويۋ سوماسىنىڭ 1 پايىزى، ءبىراق 10000 ا ە ك- تەن ارتىق ەمەس؛

زاڭدى تۇلعالار ءۇشىن - تالاپ قويۋ سوماسىنىڭ 3 پايىزى، ءبىراق 20000 ا ە ك- تەن ارتىق ەمەس.

سونىمەن قاتار سوت اكتىلەرىن كاسساتسيالىق تارتىپپەن قايتا قاراۋ تۋرالى ءوتىنىشحاتتار بويىنشا ستاۆكانى قولدانۋ ءتارتىبى وزگەرتىلدى. وسىلايشا، مەملەكەتتىك باج مولشەرلەمەسى ءوتىنىش بەرگەن سۋبەكتىگە بايلانىستى قولدانىلادى. اتالعان وزگەرىستەر 2023-جىلعى 21- مامىردان باستاپ قولدانىسقا ەنگىزىلەدى.

قازاقستان رەسپۋبليكاسى ازاماتىنىڭ (16 جاسقا دەيىنگى بالالار ءۇشىن) پاسپورتىن بەرگەنى ءۇشىن ستاۆكالار 8 دەن 4 ا ە ك- كە دەيىن تومەندەتىلدى.

قازاقستان رەسپۋبليكاسى ازاماتىنىڭ پاسپورتىن (16 جاسقا دەيىنگى بالالاردى قوسپاعاندا) بەرگەنى ءۇشىن مولشەرلەمەلەر بەلگىلەندى:

36 بەت - 8 ا ە ك؛

48 بەت - 12 ا ە ك؛

قازاقستان رەسپۋبليكاسى ازاماتىنىڭ جەكە كۋالىگىن بەرگەنى ءۇشىن ونى ءبىر جىل ىشىندە ەكى رەتتەن ارتىق جوعالتۋىنا بايلانىستى - 1 ا ە ك مولشەرلەمەسىن بەلگىلەۋ.

2024-جىلعى 1 -قاڭتاردان باستاپ قولدانىسقا ەنگىزىلەدى.