ديزەل «كولەڭكەلى ەكسپورت» ارقىلى شىعارىلىپ جاتىر - بولات اقشولاقوۆ
بۇل تۋرالى ق ر ەنەرگەتيكا ءمينيسترىنىڭ مىندەتىن اتقارۋشى بولات اقشولاقوۆ ايتتى، دەپ حابارلايدى قازاقپارات ءتىلشىسى.
«جانارماي تاپشىلىعىن بولدىرماۋ ماقساتىندا ءتۇرلى شارالار قابىلداندى. وسى ورايدا جانارمايدى تەمىرجول جانە اۆتوكولىكپەن شىعارۋعا تىيىم سالىندى. رەسۋرس يەلەرىنە جانارمايدى تىكەلەي جانارماي قۇيۋ ستانتسيالارىنا ساتۋعا مىندەتتەيتىن زاڭنامالىق نورمالار قابىلداندى. مۇنايدى جەتكىزۋ جانە مۇناي ونىمدەرىن ساتۋ كەزىندەگى دەلدالدارعا توسقاۋىل قويىلدى. بۇدان باسقا، بىلتىر تامىز ايىندا تاپشىلىقتى ازايتۋ ءۇشىن سارالانعان باعانى جانە ليميت ەنگىزدىك. ءبىراق بارلىق شەكتەۋگە قاراماستان، «كولەڭكەلى ەكسپورت» ارقىلى وتىندى شىعارۋ مۇمكىندىكتەرى تابىلدى. وسىعان بايلانىستى تاپشىلىقتى بولدىرماۋ ءۇشىن شۇعىل تۇردە قىمبات يمپورتتىق وتىندى ساتىپ الۋعا ءماجبۇر بولىپ وتىردىق»، - دەدى ب. اقشولاقوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، ەلىمىزدە قازىرگى تومەن باعالار ساقتالسا، قازاقستاندا قانشا جانارماي وندىرىلسە دە بارلىق سۇرانىستى قامتاماسىز ەتۋ مۇمكىن بولمايدى.
«ەكىنشىدەن، باعالار اراسىنداعى ايتارلىقتاي ايىرماشىلىققا بايلانىستى كورشى ەلدەرگە «اعىن» جالعاسا بەرەدى، ونىڭ كولەمى ارتا تۇسەدى. ەشقانداي شەكتەۋلەر ناتيجە بەرمەيتىنى انىق. ۇشىنشىدەن، جانارماي باعاسىنداعى ديسپروپورتسيا «كولەڭكەلى» نارىقتى نىعايتىپ، ۇلتتىق ەكونوميكاعا، مۇددەگە كەرى اسەرىن تيگىزەدى. تورتىنشىدەن، جانارماي بويىنشا تومەن باعانى ساقتاۋ مۇناي-گاز سالاسىنا ينۆەستيتسيا تارتۋعا، ونى دامىتۋعا، گەولوگيالىق بارلاۋ جۇمىستارىن جۇرگىزىپ، رەسۋرستىق بازانى تولىقتىرۋعا مۇمكىندىك بەرمەي وتىر»، - دەدى ءمينيستردىڭ مىندەتىن اتقارۋشى.
ونىڭ سوزىنە قاراعاندا، ىشكى نارىقتاعى جانارماي جاعدايىن تۇراقتاندىرۋ ءۇشىن قازاقستاننىڭ كورشى ەلدەرمەن سالىستىرعانداعى باعا بويىنشا ايىرماشىلىقتى ازايتۋ قاجەت.
بۇدان بۇرىن حابارلانعانداي، قازاقستاندا بەنزين مەن ديزەل وتىنىنىڭ باعاسى وسەدى.
ق ر ەنەرگەتيكا ءمينيسترىنىڭ مىندەتىن اتقارۋشى بولات اقشولاقوۆ ەلىمىزدە جانارماي باعاسىنىڭ وسۋىنە قانداي سەبەپتەر اسەر ەتىپ وتىرعانىن ايتتى.
