قازاقستاندا بەنزين مەن ديزەل وتىنىنىڭ باعاسى وسەدى

استانا. قازاقپارات - قازاقستاندا بەنزين مەن ديزەل وتىنىنىڭ باعاسى قىمباتتايدى. بۇل تۋرالى ق ر ەنەرگەتيكا ءمينيسترىنىڭ مىندەتىن اتقارۋشى بولات اقشولاقوۆ ايتتى، دەپ حابارلايدى قازاقپارات ءتىلشىسى.

«قازىرگى تومەن باعالاردى ساقتاپ وتىرساق، ءبىز قانشا جانارماي وندىرسەك تە، بارلىق سۇرانىستى قامتاماسىز ەتە المايمىز.

ەكىنشىدەن، باعالار اراسىنداعى ايتارلىقتاي ايىرماشىلىققا بايلانىستى كورشى ەلدەرگە «اعىن» جالعاسا بەرەدى، ونىڭ كولەمى ارتا تۇسەدى. ەشقانداي شەكتەۋلەر ناتيجە بەرمەيتىنى انىق.

ۇشىنشىدەن، جانارماي باعاسىنداعى ديسپروپورتسيا كولەڭكەلى نارىقتى نىعايتىپ، ۇلتتىق ەكونوميكاعا، مۇددەگە كەرى اسەرىن تيگىزەدى.

تورتىنشىدەن، جانارماي بويىنشا تومەن باعانى ساقتاۋ مۇناي-گاز سالاسىنا ينۆەستيتسيا تارتۋ، ونى دامىتۋعا، گەولوگيالىق بارلاۋ جۇمىستارىن جۇرگىزىپ، رەسۋرستىق بازانى تولىقتىرۋعا مۇمكىندىك بەرمەي وتىر»، - دەدى ب. اقشولاقوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، ىشكى نارىقتاعى جانارماي جاعدايىن تۇراقتاندىرۋ ءۇشىن قازاقستاننىڭ كورشى ەلدەرمەن سالىستىرعانداعى باعا بويىنشا ايىرماشىلىعىن ازايتۋ قاجەت.

«بۇل قيىن، ءبىراق قاجەت شەشىمگە بارۋ كەرەكپىز، ونى مويىنداۋ كەرەك. ياعني بولشەك ساۋداداعى جانارماي باعاسىن كوتەرۋ قاجەت. وسى تۇرعىدا اي-92 جانە اي-93 ماركالى بەنزينگە باعانى ليترىنە 182-187 تەڭگەدەن 205 تەڭگە قىلۋ (وڭىرگە بايلانىستى)، ءوسىم - %11. ديزەل وتىنىنىڭ باعاسى ليترىنە 295 تەڭگەنى قۇرايدى، ورتاشا ەسەپپەن ءوسىم - %20. قازىر وڭىرگە بايلانىستى باعا 230 تەڭگەدەن 260 تەڭگەگە دەيىن بولىپ تۇر. وسىنداي بۇيرىقتىڭ جوباسى بۇگىن جاريالاناتىن بولادى»، - دەدى بولات اقشولاقوۆ.