16:27, 30 - ناۋرىز 2023 | GMT +5
ەلىمىزگە كولىكپەن ءبيداي يمپورتتاۋعا تىيىم سالىنباق
استانا. قازاقپارات - قازاقستان اۋماعىنا كولىكپەن ءبيداي يمپورتتاۋعا شەكتەۋ ەنگىزىلۋى مۇمكىن. بۇل تۋرالى «اشىق» ن ق ا پورتالىندا جاريالانعان اۋىل شارۋاشىلىعى ءمينيسترىنىڭ بۇيرىعىندا جازىلعان، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنىڭ اۋماعىنا اۆتوموبيل كولىگىمەن تۇقىمدىق بيدايدى قوسپاعاندا، ءبيداي يمپورتتاۋعا التى ايعا تىيىم سالىنسىن. وسى بۇيرىقتىڭ ورىندالۋىن باقىلاۋ جەتەكشىلىك ەتەتىن ق ر اۋىل شارۋاشىلىعى ۆيتسە-مينيسترىنە جۇكتەلسىن»، - دەلىنگەن اۋىل شارۋاشىلىعى ءمينيسترىنىڭ بۇيىرىعىندا.
قۇجات 5- ساۋىرگە دەيىن كوپشىلىك تالقىلاۋدا بولادى.
ەسكە سالا كەتەيىك، بۇعان دەيىن ەلىمىزدىڭ اۋماعىنان كولىكپەن تىڭايتقىشتاردى اكەتۋگە جارتى جىلعا تىيىم سالىنۋى ىقتيمال ەكەنىن حابارلاپ ەدىك.
بۇعان قوسا، قازاقستان اۋماعىنان ءىرى قارا مەن ۇساق مالدى (ۇرعاشى) اكەتۋگە تىيىم سالىنۋى مۇمكىن.
سونىمەن قاتار، ەل اۋماعىنان مۇزداتىلعان جايىن مەن كوكسەركە بالىقتارىن ەكسپورتتاۋعا شەكتەۋ ەنگىزىلدى.
