ادام ساۋداسىنا توسقاۋىل قويۋ ءۇشىن ارنايى زاڭ قابىلداۋ قاجەت - پرەزيدەنت
«قۇقىق قورعاۋ سالاسىنداعى تاعى ءبىر كۇردەلى ماسەلە - ادام ساۋداسى. بۇعان توسقاۋىل قويۋ ءۇشىن ارنايى زاڭ قابىلداۋ قاجەت. مۇنداي زاڭ ادام ساۋداسىنىڭ قۇربانى بولعان ازاماتتاردى قورعاۋدى جانە الەۋمەتتىك قولداۋدى قامتاماسىز ەتەدى. بۇل كۇن سايىن ارتىپ كەلە جاتقان ءماجبۇرلى كوشى- قوننىڭ جاھاندىق جانە ايماقتىق پروتسەستەرى جاعدايىندا وتە ماڭىزدى»، - دەدى قاسىم- جومارت توقايەۆ.
پرەزيدەنت بۇل زاڭنىڭ ۇلتتىق مۇددەلەرىمىزدى ەسكەرە وتىرىپ، ەڭ جاقسى الەمدىك تاجىريبەنى ءسىڭىرۋى كەرەگىن اتاپ ءوتتى.
«سوندىقتان ونى ازىرلەۋگە وتاندىق ساراپشىلار جانە زاڭگەرلەرمەن قاتار حالىقارالىق ۇيىمداردىڭ وكىلدەرىن دە تارتۋ كەرەك»، - دەدى پرەزيدەنت.
مەملەكەت باسشىسى قاسىم- جومارت توقايەۆ زاڭداردىڭ كونستيتۋتسياعا تولىق ساي بولۋى كەرەگىن ايتتى.
«جۇرت زاڭداردىڭ كەيبىر ەرەجەلەرىنە نارازىلىق ءبىلدىرىپ، شاعىم ايتادى. كونستيتۋتسيالىق سوتتىڭ شەشىمدەرى كەيبىر شاعىمداردىڭ ورىندى ەكەنىن كورسەتىپ وتىر، ياعني زاڭنامانىڭ جەكەلەگەن نورمالارى اتا زاڭعا قايشى ەكەنى انىقتالدى. بۇل كەلەڭسىزدىكتەر قۇقىق قولدانۋ ىسىندە قيىندىقتار تۋعىزادى. كونستيتۋتسياعا قايشى مۇنداي نورمالار جارامسىز دەپ تانىلادى. وسىنداي ەرەجەلەرگە سۇيەنىپ قابىلدانعان سوتتىڭ جانە باسقا مەملەكەتتىك ورگانداردىڭ شەشىمدەرى قايتا قارالۋعا ءتيىس»، - دەدى قاسىم- جومارت توقايەۆ VIII سايلانعان ق ر پارلامەنتىنىڭ ءبىرىنشى سەسسياسىندا.
پرەزيدەنت زاڭداردىڭ كونستيتۋتسياعا تولىق ساي بولۋى كەرەگىن اتاپ ءوتتى.
«پارلامەنت وسى ماڭىزدى ماسەلەگە بايلانىستى تاباندىلىق تانىتىپ، باستى ءرول اتقارۋى قاجەت. بۇل جۇمىس ازاماتتاردىڭ كونستيتۋتسيالىق قۇقىقتارىن قورعاۋ جۇيەسىن كۇشەيتە تۇسۋگە مۇمكىندىك بەرەدى»، - دەدى مەملەكەت باسشىسى.
اۆتور
ايجان سەرىكجان قىزى
