پرەزيدەنت: ىشكى نارىققا باعىتتالعان وڭدەۋ ونەركاسىبىن دامىتۋ قاجەت
«باسەكەگە قابىلەتتى ەكونوميكا دەگەنىمىز - ءارتاراپتاندىرىلعان ەكونوميكا. پاندەميا جانە قازىرگى گەوساياسي داعدارىس شيكىزات نارىعىنىڭ تۇراقسىز ەكەنىن ايقىن كورسەتتى. قازبا بايلىققا عانا ارقا سۇيەپ، قامسىز وتىراتىن زامان كەلمەسكە كەتتى. جەر قويناۋىنان شىققان قازىنانىڭ قوسىمشا قۇنىن بارىنشا ارتتىرۋ كەرەك. ونى ساپالى جانە سۇرانىسقا يە تاۋارعا اينالدىرۋ وتە ماڭىزدى. بۇعان دەيىنگى يندۋستريالاندىرۋ جۇمىسىنىڭ بارىسىندا شيكىزاتتىق ەمەس سالا ويداعىداي دامىعان جوق. ازىق- تۇلىك پەن كۇندەلىكتى تۇتىناتىن تاۋاردىڭ ءوزىن ءالى كۇنگە دەيىن سىرتتان ساتىپ الىپ وتىرمىز. ينفلياتسيانىڭ وسۋىنە باستى سەبەپتىڭ ءبىرى - وسى»، - دەپ توقتالدى پرەزيدەنت VIII سايلانعان ق ر پارلامەنتىنىڭ ءبىرىنشى سەسسياسىندا.
بۇل ماسەلەنى شەشۋ جولىندا مەمەلەكەت باسشىسى ءوز الەۋەتىمىز شەگىندە ىشكى نارىققا باعىتتالعان وڭدەۋ ونەركاسىبىن دامىتۋدى تاپسىردى.
«ەلىمىزدىڭ ەكونوميكاسى سىرتقى ساۋداعا جانە ينۆەستيتسياعا ءاردايىم اشىق. قازاقستان - دۇنيەجۇزىلىك ساۋدا ۇيىمىنىڭ مۇشەسى. سوندىقتان، سىرتقى ساۋدامىزدى ەركىن تۇردە دامىتۋىمىز كەرەك. ءبىراق، كەمىندە ءوز الەۋەتىمىز جەتەتىن نارسەلەرمەن ءوزىمىزدى قامتاماسىز ەتۋىمىز قاجەت. مىسالى، شيكىزات تا، ماماندار دا، كەيبىر تەحنولوگيا دا ءوز ەلىمىزدە بار. ەلدىڭ ىشكى سۇرانىسىن وتەۋگە قاتىستى ءبىر نەگىزگى ۇستانىم بولۋعا ءتيىس. ەڭ الدىمەن، ىشكى نارىققا باعىتتالعان وڭدەۋ ونەركاسىبىن دامىتۋىمىز قاجەت»، - دەدى قاسىم- جومارت توقايەۆ.
ۇكىمەت پەن پارلامەنت تۋريزمدى دامىتۋ ماسەلەسىنە باسا نازار اۋدارۋعا ءتيىس.
«تاعى ءبىر ماڭىزدى ماسەلە - ۇكىمەت جانە پارلامەنت ءتۋريزمدى دامىتۋ ماسەلەسىنە باسا نازار اۋدارۋعا ءتيىس. ەلىمىزدەگى تۋريزمنىڭ الەۋەتى زور، كورىكتى جەرلەرىمىز وتە كوپ. ءبىراق، سول جەرلەرگە بارىپ، دەمالۋعا ءالى دە جۇرتتىڭ قولى جەتە بەرمەيدى. بۇل سالاعا تىڭ سەرپىن بەرۋ ءۇشىن، ەڭ الدىمەن، ينفراقۇرىلىم ماسەلەسىن كەشەندى تۇردە شەشىپ، قىزمەت ساپاسىن تۇبەگەيلى جاقسارتۋ قاجەت»، - دەدى قاسىم- جومارت توقايەۆ.
پرەزيدەنتتىڭ پىكىرىنشە، كاسىپكەرلەر تۋريزمنىڭ بولاشاعى زور ەكەنىن كورۋى كەرەك.
«سول ءۇشىن قاجەتتى جاعدايدى جاساعان ءجون. وسى سالاعا سالىنعان جەكە ينۆەستيتسيانىڭ كولەمى، ىشتەن جانە سىرتتان كەلگەن تۋريستەردىڭ سانى نەعۇرلىم كوپ بولسا، جۇمىستىڭ ناتيجەسى دە سوعۇرلىم ءتيىمدى بولماق»، - دەدى مەملەكەت باسشىسى.
ايتا كەتەيىك، ەلوردادا VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسى اشىلدى.
پارلامەنت پالاتالارىنىڭ بىرلەسكەن وتىرىسى رەسپۋبليكالىق تەلەارنالاردا جانە الەۋمەتتىك جەلىلەردە تىكەلەي ەفيردەن كورسەتىلىپ جاتىر. جيىنعا جاڭادان سايلانعان دەپۋتاتتار، مەملەكەتتىك ورگانداردىڭ باسشىلارى، ۇلتتىق قۇرىلتاي مۇشەلەرى، قوعام قايراتكەرلەرى قاتىسۋدا.
