ۇلتتىق قوردان ءار بالاعا قاراجات اۋدارۋ: نەگىزگى شارتتار ازىرلەندى
ۇلتتىق قوردىڭ ينۆەستيتسيالىق تابىسىنىڭ جارتىسى جىل سايىن 18 جاسقا دەيىنگى بالالار اراسىندا بولىنەدى. 18 جاسقا دەيىنگى بالانىڭ شوتىندا جيناقتالاتىن قاراجات شامامەن 3,5 مىڭ ا ق ش دوللارىن قۇراۋى مۇمكىن.
«ءتيىستى ەسەپشوت «ب ج ز ق» ا ق- دا ادىلەت مينيسترلىگىنىڭ جەكە تۇلعالار دەرەكقورى نەگىزىندە اۆتوماتتى تۇردە اشىلادى. جىل سايىن قاڭتار ايىندا جوباعا قاتىسقان ساتتەن باستاپ 18 جاسقا تولعانعا دەيىن «ب ج ز ق» ا ق- داعى بالالاردىڭ شوتتارىندا شارتتى تۇردە قاراجات ەسەپتەلەدى. مىسالى، ەگەر بالا جوبا باستالعان كەزدە 5 جاستا بولسا، وعان جىل سايىن 13 جىل ىشىندە، ياعني كامەلەتكە تولعانعا دەيىن ۇلتتىق قوردىڭ ينۆەستيتسيالىق تابىسىنىڭ ءبىر بولىگى بولىنەدى»، - دەلىنگەن قارجى مينيسترلىگى مالىمەتىندە.
اتاپ ايتقاندا، جوباعا قازاقستان رەسپۋبليكاسىنىڭ ازاماتتارى عانا قاتىسادى. ەگەر 18 جاسقا تولعانعا دەيىن ەلدەن كەتىپ، قازاقستان ازاماتتىعىن وزگەرتسە، وندا تولەمدەردى تالاپ ەتە المايدى. قاراجات بالالار اراسىندا قايتا بولىنەدى. بالا 18 جاسقا دەيىن ازاماتتىعىن اۋىستىرماي، ەلدەن كەتكەن جاعدايدا، اتالعان تولەمدەردى الۋ قۇقىعى ساقتالادى.
سونىمەن قاتار شوتتاعى قاراجاتقا سالىق سالىنبايدى. ءىس جۇزىندە 18 جاسقا تولعانعا دەيىن اقشا ۇلتتىق قوردا قالىپ، ينۆەستيتسيا رەتىندە يگەرىلەدى.
«18 جاسقا تولعان كەزدە قاراجات بالانىڭ مەنشىگى بولادى، ول قاراجاتتى قالاي پايدالانۋ كەرەك ەكەنىن ءوز ەركىمەن شەشۋى كەرەك (ءبىلىم الۋعا نەمەسە تۇرعىن ءۇي جاعدايىن جاقسارتۋعا). بۇل رەتتە شەتەلدىك ج و و- دا وقۋ اقىسىن تولەۋگە قاراجاتتى پايدالانۋعا شەكتەۋ بولمايدى. تۇرعىن ءۇي جاعدايلارىن جاقسارتۋ نەمەسە تۇرعىن ءۇي ساتىپ الۋ ءۇشىن قاراجاتتى پايدالانۋ تەك قازاقستان اۋماعىندا عانا رۇقسات ەتىلەدى»، - دەپ اتالىپ وتكەن مينيسترلىك حابارلاماسىندا.
بۇدان بولەك، ازاماتتىق زاڭناماعا سايكەس، ءىس جۇزىندە جيناقتالعان قاراجاتتى مۇراگەرلىك بويىنشا بەرۋ مۇمكىندىگى ەسكەرىلگەن.
جالپى، ۇسىنىلعان الگوريتم بويىنشا جوبانى ىسكە قوسۋ ءۇشىن زاڭناماعا وزگەرىستەردى قوسا العاندا، دايىندىق جۇمىستارىن جۇرگىزۋ قاجەت. بيىل قازاقستان رەسپۋبليكاسىنىڭ زاڭناماسىنا جانە ءتيىستى نورماتيۆتىك قۇقىقتىق اكتىلەرگە تۇزەتۋلەر قابىلداۋ جوسپارلانىپ وتىر.
بۇدان بۇرىن حابارلانعانداي، مەملەكەت باسشىسى بىلتىرعى جولداۋىندا بالالار جىلى اياسىندا «ۇلتتىق قور - بالالارعا» اتتى جاڭا باعدارلاما ىسكە قوسىلاتىنىن ايتقان بولاتىن. وسى رەتتە جىل سايىن ۇلتتىق قوردىڭ ينۆەستيتسيالىق تابىسىنىڭ % 50 بالالاردىڭ جەكە شوتىنا اۋدارىپ وتىرۋدى ۇسىندى. اۋقىمدى جوبا 2024 -جىلدىڭ 1- قاڭتارىنان باستاپ ىسكە قوسىلماق.
اۆتور
رۋسلان عابباسوۆ
