لوندونداعى قازاقستاندىقتار دا سايلاۋعا بەلسەنە قاتىسۋدا
سايلاۋشىلاردىڭ قاتارىندا تەك لوندون قازاقتارى عانا ەمەس، ۇلى بريتانيانىڭ تۇكپىر-تۇكپىرىندە ۋاقىتشا نەمەسە تۇراقتى تۇرىپ جاتقان وتانداستارىمىز دا بار. داۋىس بەرۋشىلەر اراسىندا تۋريستەر دە كوپ. بىرىككەن كورولدىكتە ساياحاتتاپ جۇرگەن وتانداستارىمىز ازاماتتىق بورىشىنا جاۋاپكەرشىلىكپەن قاراپ، ەلشىلىككە ات باسىن بۇرۋدا. بۇل رەتتە سايلاۋ ۋچاسكەسى كوميسسياسىنىڭ توراعاسىمەن جانە سايلاۋشىلاردىڭ بىرىمەن اڭگىمەلەسكەن ەدىك.
«بۇگىن لوندون ۋاقىتى بويىنشا تاڭعى ساعات 7 دەن قازاقستان رەسپۋبليكاسىنىڭ ەلشىلىگى جانىنداعى 244№ سايلاۋ ۋچاسكەسى ءبىزدىڭ بۇكىل ازاماتتارىمىزعا اشىق. دەمالىس كۇنىنە قاراماستان، تاڭەرتەڭنەن باستاپ، ءبىزدىڭ وتانداستارىمىز سايلاۋعا بەلسەندى قاتىسىپ جاتىر. ولاردىڭ كوپشىلىگى ستۋدەنتتەر مەن جۇمىسشىلار، سپورتشىلار، سونداي-اق ۇلى بريتانياعا ءىس- ساپارمەن كەلگەن ازاماتتار. بيۋللەتەندەر ساناۋدان وتكەننەن كەيىن سايلاۋ ناتيجەلەرى لوندوننان استاناعا جىبەرىلەتىن بولادى»، دەيدى 244№ سايلاۋ ۋچاسكەسى كوميسسياسىنىڭ ءتوراعاسى ميراز اڭدابايەۆ.
«مەن بولاشاق باعدارلاماسى بويىنشا Queen Mary ۋنيۆەرسيتەتىندە ماگيستراتۋرادا ءبىلىم الۋدامىن. بۇگىن لوندون تورىندە ءوتىپ جاتقان سايلاۋعا ءوزىمنىڭ ساياسي كوزقاراسىمدى ءبىلدىرۋ ءۇشىن ارنايى كەلدىم. مەنىڭ ويىمشا، ءاربىر قازاقستان ازاماتى، اسىرەسە جاستار ءۇشىن ساياسي بەلسەندىلىك تانىتۋ وتە ماڭىزدى. حالقىمىزدى تولعاندىراتىن ماسەلەلەردى ەسكەرىپ، مۇددەسىن قورعايتىن ادامدار سايلاناتىنىنا سەنىمدىمىن. جالپى ساياسي ناۋقان جوعارى دەڭگەيدە ءوتىپ جاتىر»، دەيدى QUEEN MARY ۋنيۆەرسيتەتىنىڭ ماگيسترانتى ەلنار ساكەنوۆا.
پارلامەنت دەپۋتاتتارىن سايلاۋعا 400 دەن استام داۋىس بەرۋشى كەلەدى دەگەن بولجام بار. شەتەلدىك ۋچاسكەلەردەگى سايلاۋشىلار تەك پارتيالىق ءتىزىم بويىنشا عانا داۋىس بەرەدى. وتانداستارىمىزدىڭ قاۋىپسىزدىگىن قامتاماسىز ەتۋ ماقساتىندا ەلشىلىك جەرگىلىكتى پوليتسيامەن ىنتىماقتاستىقتا جۇمىس ىستەپ جاتىر. بيىلعى جىلدىڭ ءبىر ەرەكشەلىگى سايلاۋ ناۋرىز مەرەكەسى قارساڭىندا وتۋدە. سوندىقتان كەلۋشىلەرگە ەلشىلىك تاراپىنان ۇلتتىق تاعامدار ۇسىنىلىپ جاتىر. استانا مەن لوندون اراسىنداعى 6 ساعاتتىق ۋاقىت ايىرماشىلىعىنا بايلانىستى تۇماندى البيونداعى سايلاۋ قازاقستانعا قاراعاندا كەشىرەك باستالىپ، كەشىرەك اياقتالادى. ساياسي ناۋقاننىڭ مارە سىزىعىنا جەتۋىنە ءالى 11 ساعاتقا جۋىق ۋاقىت بار.
