پارلامەنتكە وپپوزيتسيا قاجەت - سەنات ءتوراعاسى

استانا. قازاقپارات - ەلىمىزدىڭ ودان ءارى دامۋى ءۇشىن ساياسي ءارى سىندارلى وپپوزيتسيا قاجەت. بۇل تۋرالى ق ر پارلامەنتى سەناتىنىڭ ءتوراعاسى ماۋلەن اشىمبايەۆ ءمالىم ەتتى، دەپ حابارلايدى قازاقپارات ءتىلشىسى.

«پارلامەنتكە كىم كەلەدى؟ ونى حالىق شەشەدى. بۇگىنگى سايلاۋدا دا شەشىمدى حالىق قابىلدايدى. ال بيلىك ول ءۇشىن جاعداي جاسايدى. مەملەكەتتىك ورگاندار ءتيىستى دايىندىق جۇمىستارىن جۇرگىزەدى. سوندىقتان ءبىزدىڭ ازاماتتار شەشىم قابىلداۋعا ءوز ۇلەسىن قوسۋى كەرەك»، - دەدى ماۋلەن اشىمبايەۆ سايلاۋدا داۋىس بەرگەن سوڭ ب ا ق وكىلدەرىنىڭ ساۋالىنا جاۋاپ بەرە تۇرىپ.

سونداي-اق جۋرناليستەر سەنات سپيكەرىنە پارلامەنتكە وپپوزيتسيا قاجەت پە دەگەن ساۋال جولدادى.

«ءيا، پارلامەنتكە وپپوزيتسيا قاجەت. وپپوزيتسيا ءارقاشان قاجەت. ايتا كەتۋ كەرەك، وپپوزيتسيا سىندارلى بولۋى كەرەك. ءبىزدىڭ ودان ءارى دامۋىمىز ءۇشىن ساياسي ءارى سىندارلى وپپوزيتسيا قاجەت. بۇل باعىتتا ءتيىستى زاڭدار قابىلداندى. ءتيىستى نورمالار بار. ەگەر ولار وزدەرىن وپپوزيتسيا دەپ جاريالاسا، ولارعا مۇمكىندىك بەرىلەدى، قۇقىقتارى بار. ءبىز قۇقىقتىق جۇيەنى قالىپتاستىردىق جانە ول جۇمىس ىستەۋى كەرەك»، - دەپ جاۋاپ قاتتى م. اشىمبايەۆ.

بۇعان دەيىن سەنات سپيكەرى بۇگىنگى سايلاۋدا ءبىر مانداتتى جانە ءوزىن-ءوزى ۇسىنعاندار اراسىندا باسەكە جوعارىلىعىن اتاپ وتكەن ەدى.

ايتا كەتسەك، ماۋلەن اشىمبايەۆ ەلورداداعى №111-سايلاۋ ۋچاسكەدە ءوز تاڭداۋىن جاسادى.