مەملەكەتتىك قىزمەتشىلەرگە الەۋمەتتىك جەلىدە جەكە پاراقشاسىن جۇرگىزۋگە بولا ما
بۇل تۋرالى بريفينگ بارىسىندا قر مەملەكەتتىك قىزمەت ىستەرى اگەنتتىگى الماتى قالاسى بويىنشا دەپارتامەنتىنىڭ باسشىسى يلدار ۇيسىمبايەۆ ءمالىم ەتتى، دەپ حابارلايدى قازاقپارات ءتىلشىسى.
سپيكەردىڭ سوزىنشە، مەملەكەتتىك قىزمەتشىلەردىڭ جەكە پاراقشاسىن جۇرگىزۋىندە ءبىرقاتار شەكتەۋ بار.
«الەۋمەتتىك جەلىلەردەگى پاراقشالاردىڭ مازمۇنىنا قاتىستى ازاماتتاردى ارانداتپاۋعا جانە مەملەكەتتىك ورگاندارعا دەگەن سەنىمگە نۇقسان كەلتىرمەۋى ءتيىس تۇستار بار. مەملەكەتتىك قىزمەتشىلەرگە قىمبات كولىكتەردىڭ، ءساندى عيماراتتاردىڭ، مەيرامحانالاردىڭ جانە تاعى باسقا فونىندا ويىن- ساۋىق ورىندارىندا تۇسكەن فوتوسۋرەتتەرىن جاريالاۋعا تىيىم سالىنادى. مەملەكەتتىك قىزمەتشى جۇمىستان تىس ۋاقىتتا دا جالپى قابىلدانعان مورالدىق قاعيدالاردى ۇستانۋى كەرەك»، - دەپ ءتۇسىندىردى سپيكەر.
سونىمەن قاتار، ول اتالعان شەكتەۋلەردەن باسقا، ادەپ كودەكسىنە سايكەس، مەملەكەتتىك قىزمەتشىلەر مەملەكەتتىك قىزمەتتىڭ بەدەلىن تۇسىرەتىن اقپاراتتى، تىيىم سالىنعان زاتتاردى قولدانۋ ارقىلى ادەپسىز مىنەز- قۇلىقتى كورسەتەتىن فوتوسۋرەتتەردى جاريالاماۋى جانە ناقتى ءدىني ۇستانىمدارىن كورسەتپەۋى ءتيىس ەكەنىن ەسكەرتتى.
