استانا ءالى دە «كوك تۇتىنگە كومىلىپ» تۇر - ءاليحان سمايىلوۆ
«2019 -جىلى سالىنعان «سارى ارقا» ماگيسترالدىق گاز قۇبىرىنىڭ بويىندا ءتيىستى ينفراقۇرىلىم تارتىلىپ، قاجەتتى ىسكە قوسۋ كەشەندەرى ورناتىلدى. بۇل رەتتە، ەنەرگەتيكا مينيسترلىگىنىڭ نەگىزگى مىندەتى - گازدى ءوندىرۋ، قايتا وڭدەۋ جانە وڭىرگە دەيىن جەتكىزۋ. ال، اكىمدىكتەردىڭ مىندەتى - وسى گازدى تۇتىنۋشىلارعا دەيىن جەتكىزۋ، قوسىلۋ ءراسىمىن قولجەتىمدى، قاراپايىم جانە تۇسىنىكتى ەتۋ. سونىمەن قاتار، استانا قالاسى، قاراعاندى جانە اقمولا وبلىستارىنىڭ تۇرعىندارىن كوپتەن كۇتكەن گازعا قوسۋ قارقىنى وتە تومەن دەڭگەيدە قالىپ وتىر. بۇل وڭىرلەردىڭ تۇرعىندارى گاز تاراتۋ جەلىلەرى جوق، رۇقسات قۇجاتتارىن الۋ قيىن جانە گازعا قوسىلۋ قىمبات دەپ شاعىمدانادى. بۇل وسى وڭىرلەرگە عانا ەمەس، سونىمەن قاتار گازبەن قامتىلعان باسقا وڭىرلەرگە دە قاتىستى»، - دەدى ءاليحان سمايىلوۆ بۇگىن ۇكىمەت وتىرىسىندا.
مىسالى، ونىڭ دەرەگىنشە، الماتى وبلىسىنىڭ بيعاش اۋىلىندا تۇرعىندارعا گاز وتكىزۋگە 10 جىل بويى ۋادە بەرىلىپ كەلەدى. تۇركىستان وبلىسىنىڭ تولە بي اۋدانىنداعى الشالى اۋىلىنىڭ تۇرعىندارى دا بىرنەشە جىلدان بەرى كوگىلدىر وتىن كۇتىپ ءجۇر. باتىس قازاقستان وبلىسىنىڭ زەلەنوە اۋىلىندا گاز 2014 -جىلى وتكىزىلگەن. ءبىراق، وسى كۇنگە دەيىن اكىمشىلىك عيماراتتار عانا قوسىلعان.
«اۋىلدىق ەلدى مەكەندەردەن باسقا قالالاردا دا حالىقتى گازبەن قامتاماسىز ەتۋدە پروبلەمالار بار. ناتيجەسىن وزدەرىڭىز كورىپ وتىرسىزدار، استانا ءالى دە «كوك تۇتىنگە كومىلىپ»، اۋانىڭ لاستانۋ دەڭگەيى بويىنشا الەمدىك رەيتينگتەردە كوش باستاپ تۇر. الماتىدا 2- جىلۋ ەلەكتر ورتالىعىندا جاڭا بۋ- گاز قوندىرعىسىن سالۋ مەرزىمى كەيىنگە شەگەرىلۋدە. ءوڭىر اكىمدەرى مەن «قازاق گاز» كومپانياسىنا وسى ماسەلەلەردى ەرەكشە باقىلاۋعا الۋ كەرەك. حالىقپەن ەتەنە جۇمىس ىستەپ، بارلىق ماسەلەنى شەشۋ قاجەت»، - دەدى ءاليحان سمايىلوۆ.
بيىل ەلىمىزدە گاز تۇتىنۋ كولەمى 20 ملرد تەكشە مەترگە جەتەدى.
«بۇكىل الەمدە جىل سايىن ەكولوگيالىق تازا ەنەرگيا رەسۋرستارىنا، ەڭ الدىمەن گازعا سۇرانىس ارتىپ كەلەدى. دەموگرافيالىق ءوسۋدى، جىل سايىن ونەركاسىپتىك وبەكتىلەردىڭ ىسكە قوسىلۋىن جانە جەكە سەكتوردى گازداندىرۋدى ەسكەرسەك، قازاقستاندا دا بۇل ماسەلە وتە وزەكتى بولىپ وتىر. ەگەر 2020 -جىلى گاز تۇتىنۋ كولەمى شامامەن 17 ميلليارد تەكشە مەتردى قۇراسا، 2022 -جىلدىڭ قورىتىندىسى بويىنشا 19 ميلليارد، ال بيىل 20 ميلليارد تەكشە مەتر بولادى دەپ كۇتىلىپ وتىر»، - دەدى ول ۇكىمەت وتىرىسىندا.
وسى رەتتە ءاليحان سمايىلوۆ مەملەكەت باسشىسى ەلدى گازداندىرۋدى 60 پايىز دەڭگەيىنە جەتكىزۋ جونىندە مىندەت قويعانىن ەسكە سالدى.
«جالپى 1800-دەن استام ەلدى مەكەنگە گاز تارتىلۋى ءتيىس. 11,8 ميلليون استام قازاقستاندىق «كوگىلدىر وتىنعا» قول جەتكىزۋى كەرەك. بۇل تاپسىرمانى ەنەرگەتيكا مينيسترلىگى، قازمۇنايگاز جانە QazaqGaz كومپانيالارى مەن اكىمدەر تولىق كولەمدە ورىنداۋى ءتيىس»، - دەدى پرەمەر- مينيستر.
فوتو: primeminister.kz
اۆتور
مارلان جيەمباي
