قازاقستاننىڭ گۋمانيتارلىق جۇك تيەگەن ۇشاعى گازيانتەپكە قوندى
تۇركيانىڭ سىرتقى ىستەر ءمينيسترى ميەۆليۋت چاۆۋشوعلى قازاقستاننان گۋمانيتارلىق جۇك جەتكىزىلگەن ارناۋلى بورتتى ءوزى كەلىپ قارسى الدى.
سونىمەن قاتار ول اۋەجايدا قازاقستاننىڭ تۇركياداعى توتەنشە جانە وكىلەتتى ەلشىسى ەركەبۇلان ساپيەۆپەن جۇزدەستى.
ميەۆليۋت چاۆۋشوعلى جەتكىزىلگەن كومەككە ريزاشىلىعىن ءبىلدىرىپ، قۇتقارۋشىلارعا، جۋرناليستەرگە، ەلشىلىك قىزمەتكەرلەرىنە ىزەت كورسەتتى.
گۋمانيتارلىق جۇك مەملەكەت باسشىسىنىڭ تاپسىرماسىمەن بۇگىن تاڭەرتەڭ تۇركياعا جونەلتىلگەن بولاتىن. جۇكتىڭ ىشىندە جويقىن ءزىلزالادان زارداپ شەككەندەرگە كومەك كورسەتۋگە ارنالعان شاتىرلار، جىلىتقىشتار، جىلى كيىمدەر جانە باسقا دا قاجەتتى زاتتار بار. گۋمانيتارلىق كومەكتىڭ جالپى كولەمى 55 توننانى قۇرايدى.
سونىمەن قاتار مەملەكەت باسشىسىنىڭ تاپسىرماسىنا سايكەس ۇكىمەت جويقىن جەر سىلكىنىسى سالدارىنان زارداپ شەككەن تۇركيا رەسپۋبليكاسىنا گۋمانيتارلىق كومەك رەتىندە 1 ميلليون دوللار ءبولدى.
ال قازاقستاندىقتار تۇركياداعى جويقىن ءزىلزالادان زارداپ شەككەندەرگە 3,6 ميلليون دوللاردان استام قاراجات جيناپ بەردى.
بۇگىن قازاقستاننان گۋمانيتارلىق جۇك تيەلگەن ۇشاق تۇركيانىڭ گازيانتەپ قالاسىنا ۇشىپ شىققانىن جازعان بولاتىنبىز.
