قازاقستاننىڭ ءبىرىنشى پرەمەر-ءمينيسترى سەرگەي تەرەشەنكو جايىندا نە بىلەمىز
وسىعان وراي قازاقپارات كورنەكتى مەملەكەت قايراتكەرىنىڭ ءومىر جولى جايىنداعى دەرەكتى وقىرمان نازارىنا ۇسىنادى.
تەرەشەنكو سەرگەي الەكساندروۆيچ 1951-جىلى دۇنيەگە كەلگەن. قازاق اۋىل شارۋاشىلىعى ينستيتۋتىن، الماتى جوعارى پارتيا مەكتەبىن، رەسەي ع ا ەكونوميكا ينستيتۋتىن بىتىرگەن. ەكونوميكا عىلىمدارىنىڭ كانديداتى دەگەن عىلىمي دارەجەسى بار.
ول قازاق اۋىل شارۋاشىلىعى ينستيتۋتىن بىتىرگەننەن كەيىن سول كەزدەگى شىمكەنت وبلىسىنا قاراستى تۇلكىباس اۋدانىنىڭ كۋيبىشيەۆ اتىنداعى كەڭشارعا باس ينجەنەر رەتىندە جۇمىسقا جىبەرىلەدى. 2 جىلدان كەيىن، ياعني 1975-جىلى تۇلكىباس اۋداندىق كومسومول كوميتەتىنىڭ ءبىرىنشى حاتشىسى بولىپ سايلانادى. وندا 4 جىل جۇمىس ىستەگەننەن كەيىن تۇلكىباس اۋداندىق پارتيا كوميتەتىنىڭ مەڭگەرۋشىسى، بوگەن اۋداندىق پارتيا كوميتەتىنىڭ ەكىنشى حاتشىسى، لەنگىر اۋداندىق پارتيا كوميتەتىنىڭ ءبىرىنشى حاتشىسى بولادى.
1985-جىلى قازاقستان كوممۋنيستىك پارتياسىنىڭ ورتالىق كوميتەتى ۇيىمداستىرۋ-پارتيا جۇمىسى ءبولىمىنىڭ ينسپەكتورى بولىپ قىزمەتكە كىرىسكەنىمەن سول جىلى شىمكەنت وبلىستىق پارتيا كوميتەتىنىڭ حاتشىلىعىنا جىبەرىلەدى. ال 1986-1989-جىلدارى شىمكەنت وبلىستىق اتقارۋ كوميتەتىنىڭ ءتوراعاسى قىزمەتىن اتقارادى. 1989-1991-جىلدارى قازاق ك س ر مينيسترلەر كەڭەسى ءتوراعاسىنىڭ ءبرىنشى ورىنباسارى، قازاق ك س ر جوعارعى كەڭەسى ءتوراعاسىنىڭ ءبىرىنشى ورىنباسارى، قازاق ك س ر پرەزيدەنتىنىڭ ورىنباسارى، قازاق ك س ر پرەزيدەنتى كەڭسەسىنىڭ باسشىسى، شىمكەنت وبلىستىق پارتيا كوميتەتىنىڭ 1-حاتشىسى، سونداي-اق حالىق دەپۋتاتتارى وبلىستىق كەڭەسىنىڭ ءتوراعاسى بولادى.
ال 1991-جىلدىڭ قازانى مەن 1994-جىلدىڭ قازانى ارالىعىندا قازاقستان رەسپۋبليكاسىنىڭ ءبىرىنشى پرەمەر-ءمينيسترى بولىپ ەڭبەك ەتتى. ول ۋاقىت ەلىمىز ەندى ەگەندىك الىپ، ەكونوميكامىزداعى احۋال وتە مۇشكىل كەزەڭ ەدى.
وسى ورايدا ايتا كەتەرلىگى، 2021-جىلى «قازاقپارات» حالىقارالىق اقپارات اگەنتتىگى ەل تاۋەلسىزدىگىنىڭ 30 جىلدىعىنا ارناپ «تاۋەلسىزدىك تۋرالى 100 اڭگىمە» ەلەكتروندى كىتابىن دايىنداپ شىعارعان بولاتىن. ءدال وسى كىتاپتا سەرگەي تەرەشەنكو ەستەلىكتەرىن بولىسكەن-ءدى.
«بۇكىل ەكونوميكالىق پروبلەما مينيسترلەر كابينەتىنىڭ موينىنا ارتىلدى. سول ۋاقىتتا، اسىرەسە وتكەن كەزەڭدە بىزدە كاسىبي ۇكىمەت بولعانىن اتاپ وتكىم كەلەدى... جوسپارلانعان دۇنيەنىڭ كوپشىلىگىن جۇزەگە اسىرا الماعانىمىز باسقا ماسەلە. سەبەبى ەڭ الدىمەن قاراجات جەتىسپەگەن بولاتىن ينفلياتسيا سۇمدىق، 2400، 2600 پايىز بولاتىن. ايتالىق، بۇگىن 1 رۋبل بولعان زات ەرتەڭىندە 20 تيىن عانا بولىپ قالاتىن. ارينە، كوپ جۇمىس ىستەۋگە تۋرا كەلدى. قيىندىقتار دا كوپ بولدى. كەڭەستىك باسقارۋ مەكتەبىنەن وتكەنىم كوپ سەپتىگىن تيگىزدى. پارتيالىق جانە مەملەكەتتىك قۇرىلىستىڭ بارلىق ساتىسىنان ءوتۋىم دە كومەك بولدى»، - دەپ ەسكە العان ەدى سەرگەي تەرەشەنكو ەل ۇكىمەتىن باسقارعان كەزەڭى جايىندا.
ول 1994-جىلعى قازاننان باستاپ «ينتەگراتسيا» حالىقارالىق قورىنىڭ باسقارما ءتوراعاسى جانە سوڭعى بەنەفيتسيارى بولدى. قوردىڭ باستى ماقساتى - گەوينتەگراتسيالىق ۇدەرىستەرگە جانە قازاقستاننىڭ قازىرگى الەمنىڭ ءبىرتۇتاس ەكونوميكالىق، ساياسي جانە مادەني كەڭىستىگىنە تەڭ قۇقىلى كىرۋىنە عىلىمي-پراكتيكالىق جاردەمدەسۋ. قوردىڭ نەگىزىنەن اۋىل شارۋاشىلىعى ونىمدەرىن وندىرۋمەن جانە ساتۋمەن تىكەلەي اينالىساتىن 150 دەن استام ەنشىلەس فيرماسى بار.
سەرگەي تەرەشەنكو «وتان» رەسپۋبليكالىق ساياسي پارتياسى ءتوراعاسىنىڭ مىندەتىن اتقارۋشى، قازاقستان حالىقتارى اسسامبلەياسى ءتوراعاسىنىڭ ورىنباسارى، 2004-جىلعى 15- ساۋىردەن باستاپ قازاقستاننىڭ ساقتاندىرۋ نارىعىنا قاتىسۋشىلار قاۋىمداستىعىنىڭ پرەزيدەنتى قىزمەتتەرىن اتقاردى. ءبىرقاتار مەملەكەتتىك ناگرادامەن ماراپاتتالعان ول الماتى قالاسىنىڭ جانە وڭتۇستىك قازاقستان وبلىسىنىڭ قۇرمەتتى ازاماتى، ءيزرايلدىڭ قۇرمەتتى كونسۋلى بولدى.
2010-جىلدىڭ ناۋرىز ايىندا ۇلتتىق ومارتاشىلار وداعىن قۇرىپ، وعان جەتەكشىلىك جاسادى. وداق كادرلارىن رەسەيدىڭ ارا شارۋاشىلىعى اكادەمياسىنا جىبەرىپ، بىلىمدەرىن جەتىلدىرۋگە كۇش سالدى.
بال اراسىن عىلىمي تۇرعىدان زەرتتەدى، شارۋاشىلىققا جاڭا تەحنولوگيا الىپ كەلۋمەن اينالىستى. ءونىمىن قىتاي، رەسەي، قىرعىزستان سىندى ءبىرقاتار شەت ەلدەرگە شىعاردى.
