پرەزيدەنتكە حالىقتى تۇرعىن ۇيمەن قامتاماسىز ەتۋ جونىندە ۇسىنىستار ايتىلدى

استانا. قازاقپارات - پرەزيدەنت قاسىم-جومارت توقايەۆ «بايتەرەك» ۇلتتىق باسقارۋشى حولدينگى» ا ق باسقارما ءتوراعاسى قانات شارلاپايەۆتى قابىلدادى.

بۇل تۋرالى اقورداعا سىلتەمە جاساپ قازاقپارات حابارلايدى.

مەملەكەت باسشىسىنا حولدينگتىڭ بىلتىر اتقارعان جۇمىستارىنىڭ قورىتىندىسى تۋرالى ەسەپ بەرىلىپ، الداعى كەزەڭگە ارنالعان جوسپارى تانىستىرىلدى. پرەزيدەنتكە كاسىپكەرلىكتى، اگروونەركاسىپ كەشەنىن قولداۋ جانە حالىقتى تۇرعىن ۇيمەن قامتاماسىز ەتۋ جونىندە ۇسىنىستار جەتكىزىلدى.

مەملەكەت باسشىسىنا حولدينگتىڭ 2022-جىلى 350 ميلليارد تەڭگە تازا رەكوردتىق پايدا تاپقانى تۋرالى باياندالدى. بۇل 2020-جىلعى كورسەتكىشتەن بەس ەسە جانە 2021-جىلعى ناتيجەدەن ءۇش ەسە كوپ.

وتكەن جىلدىڭ قورىتىندىسى بويىنشا قۇنى 685 ميلليارد تەڭگە بولاتىن 238 ءىرى جوبا مەن ليزينگتىك مامىلەلەر قارجىلاندىرىلدى. شاعىن جانە ورتا بيزنەستى قولداۋ اياسىندا سوماسى شامامەن 1,5 تريلليون تەڭگەنى قۇرايتىن 50,5 مىڭ جوباعا سۋبسيديا بەرىلدى.

باسقارما ءتوراعاسىنىڭ مالىمەتىنە سايكەس اگروونەركاسىپ كەشەنى سۋبەكتىلەرىنە جوسپارلانعان 432 ميلليارد تەڭگەنىڭ ورنىنا 522 ميلليارد تەڭگە كولەمىندە قارجى بولىنگەن.

سونىمەن قاتار قانات شارلاپايەۆ حالىقتى تۇرعىن ۇيمەن قامتاماسىز ەتۋ اياسىندا جالپى قۇنى شامامەن 1,4 تريلليون تەڭگە جەڭىلدەتىلگەن يپوتەكالىق قارىز بەرىلگەنى، قۇنى 211,8 ميلليارد تەڭگەنى قۇرايتىن ۇلەستىك قۇرىلىسقا كەپىلدىك جاسالعانى، كرەديتتىك تۇرعىن ءۇي قۇرىلىسىن قارجىلاندىرۋ ءۇشىن اكىمدىكتەرگە 176,4 ميلليارد تەڭگە بولىنگەنى تۋرالى باياندادى. وسىلايشا، قولداۋ شارالارىنىڭ ناتيجەسىندە 2,2 ميلليون شارشى مەتردەن استام تۇرعىن ءۇي پايدالانۋعا بەرىلدى، يپوتەكالىق كرەديت بەرۋ ەسەبىنەن 79865 وتباسى تۇرمىستىق جاعدايىن جاقسارتتى.

مەملەكەت باسشىسى بيزنەستى ودان ءارى قولداۋدىڭ ماڭىزدىلىعىنا باسا نازار اۋداردى. سونداي-اق ەلىمىزدىڭ ەكسپورتتىق الەۋەتىن ارتتىرۋعا جانە اگروونەركاسىپ كەشەنىن دامىتۋعا «بايتەرەك» حولدينگىنىڭ بەلسەندى اتسالىسۋى قاجەت ەكەنىن ايتتى.