قازاقستاننىڭ التىن ەكسپورتىنان تۇسەتىن تابىسى ءوستى
Finprom.kz پورتالىنىڭ مالىمەتىنشە، 2022-جىلدىڭ قاڭتار-قاراشا ايلارىندا قازاقستاندىق ەكسپورتتاۋشىلار شەتەلگە جالپى سوماسى 66,9 ميلليون ا ق ش دوللارىنا 4,2 توننا وڭدەلگەن جانە وڭدەلمەگەن التىن جونەلتتى. بۇل 2021-جىلى تولىق ەكسپورتتالعان التىن كولەمىمەن شامالاس. دەگەنمەن، اقشالاي العاندا ءوسىم بىردەن 88 پايىزدى قۇرادى.
ءبىر قىزىعى، 2022-جىلى قازاقستاندىق التىن ەكسپورتىنىڭ قۇرىلىمى وزگەردى. ەگەر 2017-2021-جىلدارى سارى مەتالدىڭ نەگىزگى ساتىپ الۋشىسى قىرعىزستان بولاتىن. وتكەن جىلى دا وسى ەلگە ەكسپورت كولەمى فيزيكالىق ماندە 52,5 پايىزدى نەمەسە 2,2 توننانى قۇرادى. ءبىراق رەسەي اقشالاي ەڭ كوپ ساتىپ الدى. ياعني، ساتىلعان التىننىڭ 41,2 ميلليون دوللارى رەسەيگە، ال 25,7 ميلليون دوللارى قىرعىزستانعا تيەسىلى.
قازاقستان التىنىن ساتۋدان تۇسەتىن تابىس ءوسىمىنىڭ ماڭىزدى فاكتورى الەمدىك نارىقتاعى قولايلى جاعداي بولدى. World Gold Council حالىقارالىق ۇيىمىنىڭ دەرەگىنشە، 2022-جىل سوڭعى ونجىلدىقتا وسى باعالى مەتالعا ەرەكشە ينۆەستيتسيالىق سۇرانىس ارتتى.
بىلتىر الەمدە 4742 توننا التىن ساتىلدى. بۇل 2021-جىلمەن سالىستىرعاندا 18 پايىزعا ارتىق. ونىڭ ۇستىنە، بۇل نەگىزىنەن ءارتۇرلى ەلدەردىڭ ورتالىق بانكتەرى تاراپىنان وسى اكتيۆكە سۇرانىستىڭ ارتۋىنا بايلانىستى. تۇراقسىزدىق پەن پەسسيميستىك بولجامدار اياسىندا ولار 1136 توننا التىن ساتىپ الدى.
سۇرانىستىڭ ارتۋى باعاعا دا اسەر ەتتى. وتكەن جىلى ساتۋ ءۇشىن ەڭ قولايلى ۋاقىت ناۋرىز-ءساۋىر ايلارى بولدى. ول كەزدە التىننىڭ ءبىر ۋنتسياسىنىڭ قۇنى 1,9 مىڭ دوللاردان جوعارى بولعان. باعا ەڭ تومەن ۋاقىت قىركۇيەك-قازان ايلارىندا تىركەلدى. وندا ءبىر ۋنتسيا باعامى 1,65-1,63 مىڭ دوللارعا دەيىن تومەندەدى.
2023-جىلدىڭ قاڭتار ايىنىڭ سوڭىنداعى جاعداي بويىنشا بۇل اكتيۆتىڭ ءبىر ۋنتسياسى 1,92 مىڭ دوللار تۇرادى. بۇل ءبىر جىل بۇرىنعىدان 7,3 پايىزعا جوعارى.
