قازاقستان تۇركيانىڭ زارداپ شەككەن اۋداندارىنا دارىگەرلەر جىبەرۋگە دايىن - اجار عينيات

استانا. قازاقپارات - قازاقستان تۇركيانىڭ زارداپ شەككەن اۋداندارىنا جىبەرۋ ءۇشىن دارىگەرلەر بريگاداسىن قۇرىپ، دايىن وتىر.

بۇل تۋرالى ءوزىنىڭ Facebook پاراقشاسىندا ق ر دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى قازاقپارات.

تۇركياداعى جويقىن جەر سىلكىنىسىنىڭ اۋقىمى مەن كوپتەگەن ادام شىعىنى بۇكىل الەمدى ءدۇر سىلكىندىرىپ، ءارقايسىمىزدىڭ وزەگىمىزدى ورتەدى.

مەديتسينا قىزمەتكەرلەرى تابيعي اپات سالدارىنان قازا تاپقان ازاماتتار ءۇشىن باۋىرلاس تۇرىك حالقىنىڭ قايعىسىنا شىن جۇرەكتەن ورتاق.

قۇلاعان عيماراتتاردىڭ استىندا قالعان ادامداردىڭ تەزىرەك قۇتقارىلۋىن، جارالانعانداردىڭ ساۋىعۋىن جانە قيراعان قالالاردىڭ قالپىنا كەلتىرىلۋىن تىلەيمىز.

قازاقستان رەسپۋبليكاسى دەنساۋلىق ساقتاۋ مينيسترلىگى تۇركيا رەسپۋبليكاسىنىڭ دەنساۋلىق ساقتاۋ مينيسترلىگىمەن تىكەلەي بايلانىستا جانە ءبىرىنشى كەزەكتە ءبىز اپاتتان زارداپ شەككەندەرگە مەديتسينالىق جانە دارىلىك كومەك كورسەتۋگە دايىن ەكەنىمىزدى بىلدىردىك.

قازىرگى ۋاقىتتا تۇركياعا قازاقستان رەسپۋبليكاسى توتەنشە جاعدايلار مينيسترلىگىنىڭ اپاتتار مەديتسيناسى ورتالىعىنىڭ مەديتسينا قىزمەتكەرلەرى بار قۇتقارۋشىلار جاساعى ۇشىپ كەتتى.

«مەديتسينالىق كومەكتى كۇشەيتۋ قاجەت بولعان جاعدايدا قازاقستان تاراپىنان تۇركيانىڭ زارداپ شەككەن اۋداندارىنا جىبەرۋ ءۇشىن دارىگەرلەر بريگاداسىن قۇرىپ، دايىن وتىرمىز»، - دەدى مينيستر.

ايتا كەتەيىك، وسىعان دەيىن قازاقستاندىق قۇتقارۋشىلار مىنگەن ۇشاق تۇركيانىڭ گازيانتەپ قالاسىنا قونعانىن حابارلادىق.