15:21, 07 - اقپان 2023 | GMT +5
اسحات ايماعامبەتوۆ ماجىلىسكە ۇسىنىلعان كانديداتۋراسى تۋرالى پىكىر ءبىلدىردى
استانا. قازاقپارات - بۇرىنعى وقۋ-اعارتۋ ءمينيسترى اسحات ايماعامبەتوۆ الداعى ءماجىلىس سايلاۋىنا «Amanat» پارتياسىنىڭ اتىنان كانديدات رەتىندە ۇسىنىلۋى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.
«ناقتى وسى پارتيادان ۇسىنىس بولدى. باسقا پارتيالاردان ۇسىنىس بولدى دەپ ايتپايمىن. ناقتى وسى ۇسىنىس»، - دەدى ول پارتيا سەزىنەن كەيىن جۋرناليستەرگە بەرگەن سۇحباتىندا.
سونداي-اق ول پارتيانىڭ الەۋەتىن پايدالانىپ ەلدىڭ دامۋىنا ۇلەس قوسۋعا نيەتتى ەكەنىن اتاپ ءوتتى.
«بۇل پارتيانىڭ ناقتى الەۋەتىن ءبارىمىز بىلەمىز. سوندىقتان بۇل مۇمكىندىكتەردى ەلىمىزدى دامىتۋ ءۇشىن پايدالانۋدى مەن وتە دۇرىس دەپ سانايمىن. ويتكەنى قازىر ۇلكەن وزگەرىستەر بولىپ جاتىر. ىشىندە ءبىز ءوزىمىزدىڭ ۇلەسىمىزدى قوسساق، جاقسى ناتيجە بەرەدى دەپ ويلايمىن»، - دەدى اسحات ايماعامبەتوۆ.
ەسكە سالساق، اسحات ايماعابەتوۆ Amanat پارتياسىنىڭ ءماجىلىس سايلاۋىنا ۇمىتكەرلەر تىزىمىنە ەنگەن بولاتىن.
