تۇركىستاندا ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمى وتەدى
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
«2023-جىلعى 9-10- اقپاندا تۇركىستان قالاسىندا ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمى وتەدى. ءىس-شارا 2022-جىلعى شىلدەدە چولپون-اتادا (قىرعىزستان) وتكەن ورتالىق ازيا مەملەكەتتەرى باسشىلارىنىڭ ءتورتىنشى كونسۋلتاتيۆتىك كەزدەسۋىنىڭ قورىتىندىسى بويىنشا قول جەتكىزىلگەن ۋاعدالاستىقتاردى جۇزەگە اسىرۋ اياسىندا وتكىزىلەدى»، - دەدى ايبەك سمادياروۆ ۆەدومستۆودا وتكەن بريفينگ بارىسىندا.
ونىڭ اتاپ وتۋىنشە، الداعى پارلامەنتارالىق فورۋمعا ورتالىق ازيا مەملەكەتتەرىنىڭ زاڭ شىعارۋشى ورگاندارىنىڭ سپيكەرلەرى مەن دەپۋتاتتارى قاتىسادى دەپ جوسپارلانعان.
«ورتالىق ازيانىڭ ءبىرىنشى پارلامەنتارالىق فورۋمىن وتكىزۋ ورتالىق ازيا ەلدەرىنىڭ زاڭ شىعارۋشى ورگاندارى ارقىلى مەملەكەتارالىق ىنتىماقتاستىقتى نىعايتۋ ءۇشىن قوسىمشا الاڭ قۇرۋ پروتسەسىن باستاۋعا مۇمكىندىك بەرەدى. فورۋم قورىتىندىسىندا تۇركىستان دەكلاراتسياسىن قابىلداۋ جوسپارلانعان»، - دەدى ول.
