ماڭگىلىك ەل داڭعىلى كەپتەلىستەن كوز اشپايدى - پرەزيدەنت
«تاعى ءبىر ماڭىزدى ماسەلە - استانانىڭ كولىك جۇيەسىن دامىتۋعا قاتىستى. اۆتوكولىك سانى جىل سايىن كوبەيىپ جاتىر. سول سەبەپتى، كولىك كەپتەلىسى وتە كۇردەلى ماسەلەگە اينالدى. بۇل، ءتىپتى، قالا تۇرعىندارىنىڭ اشۋ- ىزاسىن تۋعىزىپ وتىر. مىسالى، ماڭگىلىك ەل داڭعىلى كەپتەلىستەن كوز اشپايدى. تاۋەلسىزدىك داڭعىلىندا سالىنىپ جاتقان كوپىردىڭ قۇرىلىسىن وسى جىلدىڭ سوڭىنا دەيىن اياقتاۋ قاجەت. سونىمەن قاتار، كىشى اينالما جولدىڭ قۇرىلىسى سوزىلىپ كەتتى. ونىڭ ۇستىنە، جاڭا تۇرعىن ءۇي كەشەندەرىن سالعاندا جول ماسەلەسى تولىققاندى ەسكەرىلمەي جاتىر. ءبىر سوزبەن ايتقاندا، كولىك سالاسىن دامىتۋ جۇمىسى اقساپ تۇر. سوندىقتان، ماسەلەمەن جۇيەلى تۇردە اينالىسۋ قاجەت»، دەدى ق ر پرەزيدەنتى.
سونداي- اق پرەزيدەنت قالا جولدارىنىڭ جاي- كۇيىنە توقتالىپ ءوتتى.
«قالا جولدارىنىڭ جاي- كۇيى دە ءماز ەمەس. مىسالى، كەيبىر كوشەلەر جىل سايىن جوندەلەدى. ءبىراق كوكتەم شىققاندا جولدىڭ ساپاسى سىن كوتەرمەيدى. ال، كەيبىرى مۇلدەم قاراۋسىز قالعان. بۇل - جول سالۋ جانە جوندەۋ جۇمىستارى دۇرىس جۇرگىزىلمەيدى دەگەن ءسوز. بۇل ماسەلەنى ۇكىمەت مەن اكىمدىك ارنايى قاراۋى كەرەك. قاجەت بولسا، مەردىگەرلەردى اۋىستىرۋعا ءتيىس»، - دەپ اتاپ ءوتتى مەملەكەت باسشىسى.
