بيزنەسكە كەدەرگى باسى ارتىق تالاپتاردى الىپ تاستايتىن زاڭ جوباسى ەكى اپتادا ۇكىمەتكە كىرگىزىلەدى

استانا. قازاقپارات – ءاليحان سمايىلوۆ بيزنەسكە قويىلعان باسى ارتىق تالاپتاردى جوياتىن زاڭ جوباسىن ەكى اپتا ىشىندە ۇكىمەتكە ەنگىزۋدى تاپسىردى، دەپ حابارلايدى قازاقپارات ءتىلشىسى.

ۇكىمەت وتىرىسىندا پرەمەر-مينيستر ءاليحان سمايىلوۆ ۇلتتىق ەكونوميكا ءمينيسترى الىبەك قۋانتىروۆتان بيزنەسكە قويىلعان باسى ارتىق تالاپتاردى جويۋ ءۇشىن نە ىستەلىپ جاتقانىن سۇرادى.
«زاڭ جوباسى جالپى 66 جوباعا تۇزەتۋ ەنگىزەدى. قازىرگى تاڭدا وسى زاڭعا ەنگىزىلەتىن تۇزەتۋلەردى جيناپ جاتىرمىز. وسى اپتاعا دەيىن ءبىزدىڭ بارلىق مەملەكەتتىك ورگاندار ءوز ۇسىنىستارىن بىزگە جىبەرسە، جاقىن ارادا ءبىر اپتانىڭ ىشىندە ۇسىنىس ەنگىزەمىز. وعان دەيىن ءبىز ونى «اشىق ن ق ا» پورتالىنا شىعارامىز»، - دەدى مينيستر.
ءاليحان سمايىلوۆ بۇل جۇمىستى ەكى اپتانىڭ ىشىندە تىندىرۋدى تاپسىردى.
«وسى اپتانىڭ اياعىنا دەيىن بارلىق مەملەكەتتىك ورگاندار بارلىق زاڭناماعام ەنگىزەتىن ۇسىنىستارىن ۇلتتىق ەكونوميكا مينيسترلىگىنە بەرۋ كەرەك. ال مينيسترلىك كەلەسى اپتانىڭ باسىنان باستاپ، ەكى اپتا مەرزىمىندە ۇكىمەت اپپاراتىنا زاڭ جوباسىن ەنگىزۋى قاجەت. ونى تەزدەتىپ قابىلداۋىمىز كەرەك»، - دەدى ۇكىمەت باسشىسى.

بيزنەسكە قويىلاتىن باسى ارتىق تالاپتاردى جويۋ ءۇشىن 66 زاڭ اكتىسىنە وزگەرتۋ ەنگىزىلەدى.

«زاڭدار بويىنشا ايتساق، وزگەرىستەردى تالاپ ەتەتىن شامامەن 66 زاڭ اكتىسى انىقتالدى. جۇمىستى دۇرىس ۇيىمداستىرۋ ءۇشىن وتكەن جىلى ۇيرەنشىكتى ءارى تەكسەرىلگەن ءتاسىل ۇسىنىلدى. اتالعان ءتاسىل بويىنشا رەتتەۋدىڭ ءاربىر سالاسىنداعى جۇمىس توپتارى تۇزەتۋلەر ازىرلەپ، ۇلتتىق ەكونوميكا مينيسترلىگىنە جيناقتاۋعا جولدايدى. قازىرگى تاڭدا مينيسترلىك بىرىڭعاي پۋلدى قالىپتاستىرۋ ءۇشىن 15 سالا بويىنشا تۇزەتۋلەر جيناقتاپ الدى، 17 سالا بويىنشا تۇزەتۋلەر ءالى كۇتىلىپ وتىر»، - دەدى ول.
ءمينيستردىڭ ايتۋىنا قاراعاندا، تۇزەتۋلەردىڭ بىرىڭعاي پۋلى ازىرلەنىپ، ماقۇلدانعانان كەيىن بيزنەستى جۇرگىزۋ ماسەلەلەرى جونىندەگى زاڭ جوباسىنا ەنگىزىلەدى.
اۆتور
ەسىمجان ناقتىباي