قازاقستان حالىق پارتياسى سايلاۋالدى باعدارلاماسىن بەكىتتى
«بۇگىن ءبىز، حالىق پارتياسى، ساياسي پارتيالاردىڭ ىشىندە سايلاۋ الدىنداعى سەزدى ءبىرىنشى بولىپ وتكىزىپ وتىرمىز. ءبىرىنشى بولۋدىڭ جاۋاپكەرشىلىگى - ۇلكەن، جۇگى - اۋىر. ال ءبىرىنشى بولۋ - ءبىزدىڭ ساياسي الاڭداعى ۆيزيتتىك كارتوچكامىز بولىپ كەتتى. بارشاڭىزعا بەلگىلى، بىلتىر حالىق پارتياسى مەملەكەت باسشىسىنىڭ پرەزيدەنت جانە پارلامەنت سايلاۋى تۋرالى باستاماسىن ءبىرىنشى بولىپ قولدادى. سايلاۋدا قاسىم-جومارت توقايەۆتىڭ كانديداتۋراسىن قولداۋعا حالىق كواليتسياسىن قۇرۋدى ءبىرىنشى بولىپ حالىق پارتياسى ۇسىندى»، - دەدى سەزدە ءسوز سويلەگەن پارتيا ءتوراعاسى ەرمۇحامەت ەرتىسبايەۆ.
ونىڭ اتاپ وتۋىنشە، پارتيا ءالىپتىڭ ارتىن باعۋ باعىتىن ۇستانبايدى ءارى تاباندى كۇرەسكە دايىن.
«بابالارىمىزدىڭ «بىرلىك بولسا - تىرلىك بولادى» دەگەن امانات وسيەتى بار. ارينە، بارشامىزعا بىرلىك كەرەك! دەگەنمەن، دەموكراتيا جاعدايىندا پارلامەنت سايلاۋىندا پليۋراليزم، ياعني پىكىر الۋاندىعى قاجەت. ءار پارتيا ءوزى ءۇشىن كۇرەسەدى. كۇرەس دەگەنىمىز - ديالەكتيكانىڭ ءبىرىنشى زاڭى. تەك ساياسي كۇرەسپەن عانا بىرلىككە قول جەتكىزە الامىز. سوندىقتان مەن وسى ماقالدى ءسال وزگەرتىپ، «كۇرەس ارقىلى - بىرلىك بولادى. بىرلىك بولسا - تىرلىك بولادى» دەپ ايتار ەدىم. جالپى العاندا، بىرلىك پەن بەرەكە كۇرەس ارقىلى كەلەدى. ءبىز - ۇلانعايىر جەرىمىزدى اق بىلەكتىڭ كۇشىمەن، اق نايزانىڭ ۇشىمەن قورعاعان كۇرەسكەر، باتىر بابالاردىڭ ۇرپاعىمىز. سوندىقتان دا ايتارىم - ءبىز تاباندى كۇرەس جولىنا تۇسەمىز، ءبىز حالىق مۇددەسىن جاقتايمىز»، - دەدى ول.
وسىدان كەيىن ەرمۇحامەت ەرتىسبايەۆ سەزد دەلەگاتتارىنا پارتيانىڭ سايلاۋالدى باعدارلاماسىن بەكىتۋدى ۇسىنىپ، ول ءبىراۋىزدان قولداۋ تاپتى.
