شەتەل ازاماتتارىنىڭ قازاقستان اۋماعىندا ءجۇرىپ- تۇرۋ تارتىبىنە وزگەرىستەر ەنگىزىلدى

استانا. قازاقپارات - شەتەل ازاماتتارىنىڭ قازاقستان اۋماعىندا ءجۇرىپ- تۇرۋ تارتىبىنە وزگەرىستەر ەنگىزىلدى. تولىعىراق ىشكى ىستەر مينيسترلىگىنىڭ وكىلى شۇعىلا تۇرلىبەك ايتىپ بەردى، دەپ حابارلايدى قازاقپارات ءتىلشىسى.

«ەلىمىزدە 27- قاڭتاردان باستاپ جاڭارتىلعان كوشى- قون ەرەجەلەرى كۇشىنە ەندى. ەنگىزىلگەن وزگەرىستەرگە سايكەس، قازاقستانعا ۆيزاسىز كەلگەن شەتەلدىكتەر ەلدە 30 كۇن بولا الادى. التى اي ىشىندە ۆيزاسىز شەتەل ازاماتتارىنىڭ ەلدە بولۋ مەرزىمى 90 كۇننەن اسپاۋى كەرەك. ال ە ا ە و (ەۋرازيا ەكونوميكالىق وداعى) ازاماتتارى ءۇشىن 180 كۇن ىشىندە 90 كۇننەن اسپايدى. بۇرىنعى تالاپتا بۇل ماسەلە رەتتەلمەگەن. ياعني، شەتەلدىكتەر قازاقستاندا ءجۇرىپ- تۇرۋ مەرزىمى اياقتالعاننان كەيىن ەلدەن كەتىپ، قايتا كەلىپ، مەرزىمدى جاڭارتا الاتىن ەدى»، - دەدى شۇعىلا تۇرلىبەك ۆەدومستۆودا وتكەن ونلاين بريفينگىدە.

مينيسترلىك وكىلىنىڭ مالىمدەۋىنشە، جاڭا ەرەجەلەردىڭ ۋاقىتشا تۇرۋ رۇقساتى نەمەسە ۆيزاسى بار شەتەلدىكتەرگە قاتىسى جوق.

«ەرەجە «حالىقتىڭ كوشى- قونى تۋرالى» زاڭنىڭ 6-بابىنا سايكەس كەلتىرىلگەن. شەتەل ازاماتتارىنىڭ قازاقستاندا ءجۇرىپ- تۇرۋ ەرەجەسىن بۇزۋ فاكتىسى انىقتالعان جاعدايدا شەكارا قىزمەتى «حالىقتىڭ كوشى- قونى تۋرالى» زاڭنىڭ 48-بابىنا سايكەس شارا قولدانادى»، - دەيدى ول.

اۆتور

داۋلەت ىزتىلەۋ