قازاقستاننىڭ اسكەري توپوگرافتارى زاماناۋي تەحنولوگيامەن قامتاماسىز ەتىلگەن - باس شتاب

استانا. قازاقپارات - باس شتابتىڭ گەواقپاراتتىق قامتاماسىز ەتۋ دەپارتامەنتى باستىعىنىڭ ورىنباسارى پولكوۆنيك شاياحمەت ءاشىروۆ اسكەري توپوگرافتار قىزمەتىنىڭ ەرەكشەلىكتەرى تۋرالى ايتىپ بەردى، دەپ حابارلايدى قازاقپارات ءتىلشىسى.

«الەمدەگى قاقتىعىستاردى، اسكەري شيەلەنىستەردى ەسكەرە وتىرىپ، ءبىزدىڭ دەپارتامەنت 2019 -جىلى قۇرىلعان ەدى. وسى ورايدا، ءبىزدىڭ قۇرىلىمنىڭ نەگىزگى جۇمىسىنا توقتالساق، ءبىرىنشى باعىتى توپوگەودەزيا اقپاراتىمەن قامتاماسىز ەتۋگە ارنالعان. ونىڭ اراسىندا كارتوگرافيالىق زەرتتەۋلەردى ۇسىنۋ قامتىلعان. ەكىنشىدەن، گيدرومەتەورولوگيا سالاسىنداعى اقپاراتتى باسشىلىق قۇرامعا، اۋە قورعانىسى كۇشتەرىنە جولدايمىز. ال، ءۇشىنشى باعىت اياسىندا ناۆيگاتسيا مالىمەتتەرىن قارۋلى كۇشتەر قۇرىلىمدارىنا تاراتامىز»، - دەدى ش. ءاشىروۆ قورعانىس مينيسترلىگى بريفينگىدە.

وسى ورايدا، ول ەلىمىزدەگى اسكەري توپوگرافتار بىلىكتىلىگىن ءتيىستى وقۋ- جاتتىعۋلار كەزىندە شىڭدايتىنىن، سونداي- اق سوڭعى بۋىندى قۇرالدارمەن، جابدىقتارمەن قامتاماسىز ەتىلگەنىن ايتتى.

«ولار جاھاندىق سپۋتنيكتىك جۇيەلەردى دە پايدالانادى. اسكەري وقۋ- جاتتىعۋلار كەزىندە وسى زاماناۋي تەحنيولوگيالاردى بارىنشا قولدانىپ جاتىر. اتاپ ايتقاندا، اسكەري توپوگرافتار جاقسى ناتيجە كورسەتىپ ءجۇر جانە ولاردىڭ جۇمىسىن كومانديرلەر جوعارى باعالاپ كەلەدى. ءبىزدىڭ مامانداردى سوڭعى بۋىندى تەحنولوگيالارمەن قامتاماسىز ەتۋ دە جاقسى دەڭگەيدە ەكەنىن اتاپ وتكەن ءجون»، - دەدى گەواقپاراتتىق قامتاماسىز ەتۋ دەپارتامەنتىنىڭ وكىلى.

ايتا كەتەيىك، 30- قاڭتار كۇنى اسكەري توپوگرافتار ءتول مەرەكەسىن اتاپ وتەدى.

اۆتور

رۋسلان عابباسوۆ