قازاقستاننىڭ عىلىمى «قارتايىپ» بارادى - مينيستر
«قازىر بىزدەگى عىلىمنىڭ تۇتاس مودەلىن قولدانبالى فورماتقا كوشىرىپ جاتىرمىز. عالىمدارىمىزدىڭ كۇش-جىگەرىن قوسىلعان قۇن ۇستەي الاتىن سالالارعا باعىتتايمىز. عىلىمدى سۇحبات الدىنداعى سيۋجەتتە كورسەتكەن شەكتەۋلى رەسۋرستاردان بارىنشا مول قارجىلاندىرۋعا كوشىرەمىز. پرەزيدەنتتىڭ قولداۋىنىڭ ارقاسىندا عىلىمدى قارجىلاندىرۋ كولەمىن 3,5 ەسە وسىردىك. بىلتىر 58 ميلليارد تەڭگە بولسا، بيىل 158 ميلليارد تەڭگە بولىپ وتىر. ال كەلەسى جىلى 244 ميلليارد تەڭگە بولادى. سوندا عالىمدارىمىزدىڭ زەرتتەۋلەرى مەن جوبالارىن بىلتىرعىدان ءۇش ەسە كوپ قولدايمىز»، - دەدى ول.
مينيستر عىلىمدى دامىتۋ ءۇش باسىم باعىت بويىنشا ىسكە اساتىنىن ايتادى.
«ءبىرىنشىسى - باسىم باعىتتاردى وتە انىق، ناقتى بەلگىلەۋ. ءبىزدىڭ عىلىم، عىلىمي ينستيتۋتتار كۇش-جىگەرىن قايدا، قانداي ناقتى تەحنولوگيالىق ۋچاسكەلەرگە جۇمساۋى كەرەك؟ بىزدەگى وندىرىستەردىڭ، كومپانيالاردىڭ قوسىلعان قۇنىن، عىلىمي مازمۇنىن قالاي كوتەرۋ كەرەك؟
ەكىنشى ۇلكەن باعىت - بيزنەس عىلىمدى قولداۋعا مۇددەلى بولاتىنداي سالىقتىق، ينۆەستيتسيالىق جەڭىلدىكتەر مەن جاعدايلار جاساۋ قاجەت. مۇنسىز مۇمكىن ەمەس. «سۇرانىس ۇسىنىس تۋدىرادى» دەگەن قاناتتى ءسوز بار. سۇرانىس بولماسا، ۇسىنىس تا بولمايدى»، - دەدى ساياسات نۇربەك.
سونداي-اق، ول ىرگەلى عىلىمداردى اكادەميالىق جوبالار مەن زەرتتەۋ ينستيتۋتتارىنىڭ شەڭبەرىمەن شەكتەمەي، ۋنيۆەرسيتەت دەڭگەيىندە دە دامىتۋعا كۇش جۇمسالاتىنىن ءمالىم ەتتى.
«عىلىم ۇنەمى جاس ماماندارمەن، جاڭا ماماندارمەن تولىعىپ وتىرۋ كەرەك. قازىر بىزگە ۋنيۆەرسيتەتتەردى زەرتتەۋ باعىتىندا قايتا فورماتتاۋ كەرەك. وكىنىشكە قاراي، عالىمدارىمىزدىڭ ورتاشا جاسى - 59. ۇلتتىق اكادەميانىڭ اكادەميكتەرىنىڭ ورتاشا جاسى - 69. عىلىم «قارتايىپ» بارادى. بۇل - وتە ناشار بەلگى. سوندىقتان، ءۇشىنشى باسىم باعىت - عىلىمي مامانداردى دايارلاۋ، ۋنيۆەرسيتەتتەردى زەرتتەۋشىلىك باعىتتا قايتا فورماتتاۋ جانە ۇنەمى توقتاۋسىز قوسىلىپ جاتاتىن جاڭا بۋىننىڭ، جاڭا اقىل يەلەرى مەن يننوۆاتورلاردىڭ ارناسىن قالىپتاستىرۋ»، - دەدى مينيستر.
